Publiká riba 24 Yüli 2019
Manera anteriormente a keda premirá atrobe tin un grupo grandi di eks-studianten a resultá den e mesun situashon di problema ku e grupo anterior. E problemanan di e grupo aki tambe ta similar na e problemanan di e grupo anterior, i den sierto kasonan por hasta konstatá ku e problemenan a bira mas pihó. Pa menshoná algun ehempel: eks-studiantenen ku no tin akseso na e sistema digital di DIGID i tampoko no tin akseso nan informashon. E departamento di servisio na kliente di DUO ta ménos alkansabel i e kontenido di e informashon duná ta varia dependé di e persona ku ta atendé e kliente. Varios eks-studiantenan tin varios aña pagando nan debe di estudio, pero e debe di estudio ta sigui subi na luga di baha. Tambe tin varios kaso di eks-studientenan ku ta pidi pa DUO midi nan forsa di pago I esaki ta resultá den un subida astronómiko o un duplikashon di e quota ku nan mester paga na DUO riba nan debe di estudio, kaminda nan entrada sí a keda meskos. Den kasonan di parehanan ku ambos partner tin debe di estudio e quota individual di pago pa kada partner ta wòrdu kalkulá basá e entrada agregá di ambos partner.
Durante di “4 Landen Overleg” ku a tuma lugá na Kòrsou dia 7 i 8 di febrüari 2019, e Ministernan di Enseñansa den Reino Hulandés a determiná ku ora ta midi forsa di pago di e eks-studiantenan den tur parti di Reino Hulandés esaki lo wordu apliká ne mesun manera a base di igualdat I tambe a disidí ku un kampaña di informashon lo wòrdu hasí dor di e diferente partnernan den Reino. E kampaña di informashon aki no por tuma lugá sin aporte di informashon dor di DUO. Hasta pa Ministerio di ESKD di Kòrsou, DUO ta menos alkansabel. Over di esaki mester hasi palabrashonnan konkreto, tumando na kuenta ku Ministerio di ESKD no ta disponé di datonan spesífiko ku e eks-studiantenan/ debedornan tin mester pa nan petishon di yudansa por keda atendé. Tambe tin varios prueba ku ta mustra ku e manera kon DUO ta midi forsa di pago den e parti Karibense di Reino no ta tur kaminda mesun kos. Pruebanan di esaki ta sigui despues. E manera kon e deurwaarder a bini ta atendé ku e debedornan na nòmber di DUO, ta rekerí atenshon urgente i tambe ta mustra ku ta nesesario pa hasi un investigashon profundo di e manera kon e deurwaarder ta atendé, kaminda ta pone beslag riba henter e entrada di e debedor (pago simultaneo di diferente parti di e debe di estudio via quotanan di pago inakseptabel y astronómikamentu haltu).
Tumando nota di e situashon aki, Minister Alcalá-Wallé a manda un karta pa su homologo sra Ingrid van Engelshoven na Hulanda pidiendo atenshon pa e problematika aki i un posibel plan pa solushon. Establesementu di un ‘helpdesk’ na Kòrsou na lugá di kontratá un deurwaarder mester por ta un solushon den e kuadro aki. Ministerio di ESKD di Kòrsou no tin niun klase di akseso na e informashon di e debedornan ku tin debe serka DUO i ta Hulanda so por duna mas informashon i solushon riba e materia aki.
Importante den esaki ta pa Kòrsou risibí mas informashon di Hulanda pa:
1. por hiba un kampaña dirigí di informashon pa mos studiantenan i eks studiantenan;
2. eks studiantenan tin un mihó akseso na informashon di nan kaso spesifiko na DUO;
3. por eliminá e intrankilidat y desigualdat eksistente (un ‘helpdesk’ Servisio na kliente por yuda).
