Notisia

Roadmap to Digitalisation of Education

 WILLEMSTAD – Digitalisashon ta un di e pilarnan pa desaroyo duradero di un pais ku ta di importansia pa henter un komunidat. Pesei digitalisashon di enseñansa ta un prioridat di gobièrnu, pasó konforme e akuerdo di gobernashon mester aktivá i hiba e pais na un nivel kaminda e desaroyo inovativo ta kana huntu ku modernisashon. Minister di Enseñansa, Siensia, Kultura i Deporte sr. Sithree ‘Cey’ van Heydoorn a laga e komishon di digitalisashon tene un presentashon den Konseho di Minister i splika henter e trayekto di implementashon, pa yega na digitalisashon di nos enseñansa.

E tim di trabou ku a inisiá e trayekto di digitalisashon den enseñansa na ougùstùs 2020 a keda presentá pa e direktor di Sektor di Enseñansa i Siensia, sr. Wladimir Kleinmoedig, na Konseho di Minister. E miembronan a duna un splikashon amplio di e trayekto di digitalisashon den enseñansa. Ta relevante pa bisa ku direktivanan di skol tambe ta forma parti di e tim. Nan aporte ta di gran balor paso ta den estrecho kolaborashon ku nan e trayekto ta keda kristalisá. Otro partnernan importante pa menshoná ku ta duna nan aporte na e trayekto akí ta: Bureau Telecommunicatie en Post, Aqualectra, Simple ICT, EY, Dataplanet, NetPro, Inova, Wireless World Curaçao i hopi mas. E komishon ta traha huntu ku tur e partnernan pa yega na un enseñansa optimalisá basá entre otro riba un infrastruktura duradero.

E vishon i promé parti di e trayekto di implementashon (Roadmap) a keda presentá na e gabinete. Na mes momentu a duna splikashon di vários aspekto mas ku mester keda kristalisá pa ku e otro partinan di e trayekto. Ministernan na nan turno a hasi pregunta na e tim i tambe duna input  kon pa sigui traha huntu den e trayekto. Mester indiká ku próksimamente ta sigui ku mas informashon di e trayekto den un kampaña informativo ku ta ranka sali den e luna benidero.

**riba e pòrtrètnan athunto por tuma nota di e momentu di presentashon na Konseho di Minister.

MAS NOTISIA

Ministerio konserní: Enseñansa, Siensia, Kultura & Deporte