Trayekto 'Horizonte Nobo' ku bishita di invershonista - Informashon tokante Gobièrnu di Kòrsou Bo opinion

Nieuws

Trayekto ‘Horizonte Nobo’ ku bishita di invershonista

Geplaatst op 02 November 2021 dor di Ministerio Asuntunan General i Promé Minister

Willemstad – Resientemente, komo parti di e trayekto ‘Horizonte Nobo’, un tim di e ‘Nederlandse Organisatie voor Toegepaste Natuurwetenschappelijk Onderzoek’ (TNO) a bini for di Hulanda, kompañá pa un grupo di invershonista, pa bishitá i kombersá ku diferente kompania lokal i ku Gobièrnu di Kòrsou.

 

‘Horizonte Nobo’ ta un trayekto ku a kuminsá den 2018, den kual a presentá e deseo i plannan pa amplia i invertí den energia duradero i sostenibel. Den e kuadro aki, Refineria di Kòrsou (RDK) komo parti di e trayekto, a fasilitá e kolaborashon ku TNO. Di e forma aki, por a sondeá e posibilidatnan pa hasi uzo di áreanan no utilisá i wak kon lo por krea posibilidat pa invershon ku e mira riba energía sostenibel i duradero. 

 

Kòrsou tambe ta deseá na sigui ku e desaroyo mundial aki di diversifikashon den e kadena energétiko i posibilidatnan pa generá un industria nobo ku un fin duradero. Den diferente faseta a interkambiá i investigá posibilidatnan pa Kòrsou, i tiki tiki pero sigur mas kompanianan di Gobièrnu a uni nan mes den e trayekto aki. Institutonan manera ABC Busbedrijf, CUROIL, UoC, Selikor ets. 

 

Durante di e bishita, a reuní tantu ku TNO i e diferente representantenan di kompanianan grandi di Hulanda, interesá den traha huntu ku Kòrsou. E interés di nan banda ta den e posibilidatnan ku tin di solo, laman i bientu abundante ku ta hasi Kòrsou un “Living Lab”, esta un lugá ideal pa na eskala chikí implementá desaroyonan inovativo. 

 

Na final di e bishita, diferente instansha lokal i invershonistanan a firma huntu ku Gobièrnu di Kòrsou un ‘addendum’ den kuadro di ambishonnan di kolaborashon pa yega na un ‘Living Lab’ pa asina hasi un transishon na un ekonomia duradero. E addendum a wòrdu firmá pa Promé Minister Sr. Pisas,  Minister di Desaoryo Ekonómiko, Sr. Cijntje, Minister di Tráfiko, Transporte i Planifikashon Urbano, Sr. Cooper, Minister di Salubridat, Medio Ambiente i Naturalesa, Sra. Janga, i tambe Curoil i CPA. 

 

Ministerio konserní