Notisia

Gobièrnu huntu ku Direktivanan a yega na palabrashon konkreto pa drecha 10 skol mas

            Willemstad – Fasilidatnan atraktivo pa tur skol ta un prioridat p’esei Gobièrnu huntu ku e Direktivanan di Skolnan a yega na palabrashonnan konkreto pa ku mantenshon i reparashon di mas skol. Minister di Enseñansa, Siensia, Kultura i Deporte (ESKD) sr. Sithree van Heydoorn ta informá ku e petishon pa e di dos parti pa e finansiamentu pa hasi mantenshon di e skolnan ta den preparashon.

Awor ku e promé parti pa drechá skolnan a kuminsá ta trahando na e di dos grupo di skol ku ta bin na remarke pa mantenshon. Huntu ku e kompania Policy Productions, SOAB i tur Direktiva di Skolnan a yega na un lista di 10 skol mas ku ta bai forma parti di e di dos grupo pa hasi mantenshon i reparashon. Na momentu ku e formalisashon tuma lugá ta publiká e lista di e 10 skol.

Minister enkargá ku Enseñansa sr. Sithree van Heydoorn ta traha konforme e palabrashonnan hasí pa asina por drecha e edifisionan di tur skol. Ministerio di ESKD  bou di enkargo di Minister ta sigui traha huntu ku tur e organisashon envolví. Pa duna alumnonan fasilidatnan atraktivo i kontribuí na un espasio agradabel den skol i asina drecha kalidat di enseñansa pa nos alumnonan por desaroyá i alkansá na máksimo potenshal.

—

KOMUNIKASHON

** riba e potrèt athunto por tuma nota di representante di Policy Productions, SOAB i representashon di Direktivanan di Skolnan huntu ku Minister Sithree van Heydoorn. (ousente pa motibunan personal riba e potrèt representashon di Direktiva Skolnan Públiko i representashon di Direktiva di Skolnan Katóliko pero ku ta forma parti di e grupo di trabou). Pa mas potrèt bishitá: Trayekto pa drecha 10 skol mas

MAS NOTISIA

Ministerio konserní: Enseñansa, Siensia, Kultura & Deporte