Tur skol di Enseñansa di Fundeshi por sera pa 12or di mèrdia
Publiká riba 05 Yüni 2023
Komunikado relashoná ku temperatura altu na Skolnan
Tur skol di Enseñansa di Fundeshi i skol di Enseñansa Speshal di Fundeshi por sera pa 12or di mèrdia
WILLEMSTAD – Ministerio di Enseñansa, Siensia, Kultura i Deporte (ESKD) a tuma nota di e kalor ekstremadamente altu e dianan aki. P’esei miniserio di ESKD ta den deliberashon kontinuo ku Ministerio di Salubridat, Medio Ambiente i Naturalesa (SMN) i Servisio Meterológiko Kòrsou (Meteo) pa vigilá e situashon di tempu. Huntu a tuma e desishon ku ta duna posiblidat pa skol di Enseñansa di Fundeshi i Skol di Enseñansa Speshal di Fundeshi sera pa 12or di mèrdia durante di e siman di 5 pa 9 yüni 2023. E desishon aki a keda publiká na tur direktiva di skol i skolnan.
Meteo a anunsiá kódigo hel i nos ta eksperensiá temperaturanan altu manera 37.5 grado Selsio. Esaki tin konsekuensia pa ku salú di sierto gruponan di persona. P’esei ta importante pa tuma medianan pa protekshon di personal, mucha chikitu, alumno i studiante. Den kuadro di e kalor eksesivo nos ta pidi pa hasi uzo di e protokòl/instrukshon di temporada di kalor na skolnan ku ta vigente.
Ministerio di ESKD ta hasi un petishon na tur Direktiva di Skol i skolnan pa vigilá e situashon di kalor den skol i den kaso ku ta bai tuma medida pa hasi esaki den delibersahon i koperashon ku Sektor di Enseñansa i Siensia (UOW). Promé ku tuma akshon manera seramentu di skol mester tuma kontakto ku UOW pa yega na un akuerdo mutuo. Por tuma kontakto ku ministerio di ESKD na +599 9 4343788 of +599 9 5281409.
Medidanan adishonal di prevenshon na momentu ku tin temperatura altu:
- Pèrmití mucha, alumno i studiantenan pa bisti pañanan mas leve (no muchu diki);
- Oumentá provishon di awa friu den skol i den klas;
- Evitá aktividat den solo;
- Evitá moveshon eksesivo i deporte den e temporada aki (speshalmente despues di 10or di mainta).
Pa mas informashon por baha e informashon:
—
KOMUNIKASHON
