Publiká riba 14 Febrüari 2019
WILLEMSTAD- Minister di Desaroyo Ekonómiko, sr. Steven Martina huntu ku Ministerio di Desaroyo Ekonómiko(MEO) i partnernan manera Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Authorithy (CPA) konhuntamente a tene un konferensia di prensa pa asina kompartí desaroyonan den e sektor turístiko durante 2018 i tambe pronóstikonan pa loke ta trata e aña aki.
Durante aña 2018 turismo tabata un di e pilarnan ku apesar di tur desafio a sa di kontribuí tòg grandemente na nos ekonomia lokal. Tabata un aña yen di reto pero trabou duru i esfuersonan kontinuo di tur ku ta laborá den e sektor aki a duna resultado. For di punto di ekspertisio i eksperensia di kada un di e partnernan presente, tabatin notanan di kresementu i positivismo durante e konferensia di prensa ku a tuma lugá djaweps dia 14 di febrüari último. Ya ta un kustumber ku periódikamente MEO, CTB, CHATA i CPA ta tene un konferensia di prensa similar pa asina pone sifra for di e diferente áreanan den e sektor riba un liña i konhuntamente duna un perspektiva pa turismo di Kòrsou.
CTB a raportá un total di 431.701 turista di estadia ku a keda risibí na Kòrsou durante aña 2018. Si kompará esaki ku sifranan di aña 2017, nos a mira un kresementu di 8% mas turista ku a hospedá riba nos isla durante 2018. E meta na inisio di 2018 tabata pa alkansá un total di 420.200 turista di estadia i ku satisfakshon nos por mira bek ku nos a asta surpasá esaki. Tambe e kantidat total di anochi ku turistanan ta keda riba nos isla a konosé un subida di 9% na aña 2018 kompará ku aña 2017. Nos 5 merkadonan prinsipal esta; Hulanda, Estádos Unídos, Colombia, Canada i Alemania a sòru pa un total di 73% di tur bishitante ku nos a risibí na aña 2018.
Pa loke ta trata aña 2019 e kantidat di stul ku e diferente aerolíneanan ku ta bula pa Kòrsou tin pa ofresé ta mustra prometedor un biaha mas. Pa e próksimo 6 lunanan, Kòrsou lo tin un total di 491 mil stul disponibel kual ta un oumentu di 7% kompará ku e mesun periodo aki na aña pasá.
For di fin di sèptèmber di aña pasá, CTB a lansa su kampaña nobo di branding internashonal ku e slogan, ‘Feel It For Yourself’. E kampaña aki ta hala atenshon na nos isla su historia riku, su outentisidat i e variedat úniko di sitio i aktividat ku ta duna kada bishitante e libertat pa eksplorá Kòrsou manera e ta deseá. E avisonan nobo ta sumamente yamativo, inspirá pa Kòrsou su estétika vibrante. Kaminda ta suprayá ku Kòrsou no ta manera e otro islanan den region, i asina hala atenshon riba Kòrsou. Den 2019 tambe, CTB huntu ku su partnernan den sektor privá lo kontinuá ku ehekushon di e kampaña di branding internashonal aki den tur e merkadonan prinsipal.
Pa loke ta trata e desempeño hotelero, CHATA a kompartí ku e total di okupashon di kambernan tambe a krese durante aña 2018 ku 5.1% kompará ku aña 2017. Mas aleu, e tarifa promedio diario (ADR) i tambe e entrada pa kamber disponibel (RevPar) tambe a konosé un oumento. Na 2017 e tarifa diario promedio (ADR) tabata $144.35, kual na 2018 a bira $162.42. Esaki ta un subida di $18.07, kual ta 15.3%i e entrada pa kamber disponibel (RevPar) na 2018 tabata $128.70, kual ta $23.72 mas tantu ku na aña 2017. Esaki en total ta un oumento di 22.6%.
CPA a raporta pa loke ta trata turismo krusero ku den aña 2018 un kantidat total di 296 barku a bishita Kòrsou. Esaki ta un oumento di 5% kompará ku 2017. Pa loke ta trata kantidat di pasahero un montante record di 757.278 a bishita nos isla den 2018 resultando den un oumento di 19.4% di pasahero krusero kompará ku 2017.
Si nos wak e liñanan krusero Royal Caribbean International, Carnival Cruises i Pulmantur Cruises ta e tres liñanan di mas grandi i ku mas a kontribuí na e subida di pasaheronan krusero den 2018.
CPA ta positivo ku e kresementu aki lo kontinuá den 2019 i ta pronostiká ku esaki lo resultá den alrededor di 760.000-800.000 pasaheronan krusero pa e aña aki.
E kresementu ku nos por mira den tur e diferente áreanan di e sektor sin mas tabata visibel tambe riba e impakto makro ekonómiko ku turismo tabatin durante 2018. Tantu e impakto direkto komo esun indirekto a krese supstansialmente den e aña tras di lomba. Di tal índole ku ta proyekta ku turismo riba su so lo a kontribuí positivamente na Kòrsou su Produkto Interno Bruto durante 2018. Turismo ta desaroyando den bon direkshon i den e mesun rosea ku e demas partnernan MEO tambe ta proyektá ku durante 2019 turismo lo sigui krese dor di kontinuashon di e esfuersonan konhunto ku ya a bin ta tumando lugá.
Durante di e rueda di prensa gerensia di CPost International den persona di señor Thomas Roggendorf a otorgá minister Steven Martina e promé seri di stampia dediká na Turismo di Kòrsou. CPost International a disidí di dediká un emishon di stampia na turismo di Kòrsou debí ku e sektor aki a destaká den 2018. E stampia nan a keda diseñá pa señora Miryam Griffioen.
