Publiká riba 20 Sèptèmber 2018
27 di sèptèmber awor ta e último dia ku ta posibel pa tur siudadano di Kòrsou nominá un persona ku meresé risibí rekonosementu na nivel di Reino Hulandes. Nominashon ta un forma pa duna honor na personanan ku a òf ta duna aporte eksepshonal na nos komunidat. Algun di e nominádonan lo risibí un Kondekorashon Real serka Gobernador di Kòrsou dia 27 di aprel 2019 (dia di Rei).
Nos tur konosé hende ku ta duna aporte boluntario na bienestar di nos hóben-, adulto- òf nos grandinan. Òf nos sa di hende ku a kontribuí òf destaká di forma eksepshonal na deporte, enseñansa òf siensia na Kòrsou. Si bo ta admirá un di e persona aki i bo ta haña ku e meresé keda honrá, buska, yena i entregá e formulario pa hasi bo petishon. Ta di gran importansia pa dos òf mas persona sostené bo petishon ku un karta di motivashon.
Por haña e formulario via www.gobiernu.cw. òf na Lokèt di Pèrmit (Saliña 127, Eurobuilding). Despues ku yena e formulario, deposité den un di e buzon na Lokèt di Pèrmit. Tambe por ‘mail’ e formulario yená na kondekorashonreal@gobiernu.cw. No lubidá pa hasi esaki promé ku dia 27 di sèptèmber awor.
Si bo mester di yudansa pa yena e formulario òf si bo tin pregunta tokante Kondekorashon Real tuma kontakto ku sr. Sixto Walle, presidente di Komishon Kondekorashon Real na telefon 4654390.
