Publiká riba 09 Yanüari 2023
Willemstad – Ministerio di Salubridat, Medio Ambiente i Naturalesa (GMN) a tuma nota di e desaroyonan enkuanto COVID-19 na China.
Konstantemente e departamentunan konserní di e Ministerio di GMN ta keda vigilá e situashon mundial di COVID-19.
E situashon na China ta ku e último añanan e pueblo a wòrdu protehá di COVID-19 dor di medidanan severo di “lockdown” (e asina yamá “Zero-COVID-19 strategy”). Awor ku outoridatnan na China a kita e medidanan severo aki, e vírùs a haña chèns di plama na e pais.
Ministerio di GMN ta sigui vigilá si tin oumento di riesgo pa ku importashon di (sub)-variantenan di COVID-19.
Ministerio di GMN ta rekordá pa kada persona keda kuida, prinsipalmente e grupo vulnerabel i praktiká e reglanan di higiena.
Nos a drenta e temporada di karnaval kaminda tin hopi aglomerashon di hende. GMN ta konsehá pa gosa, pero di forma konsiente i responsabel, protehá e gruponan vulnerabel i hasi uso di “zelftest” ora ta nesesario. Tambe ta konsehá esnan ku no a bakuná ainda pa hasi uso di esaki pa protehá nan mes kontra kualke (sub)-variante ku por surgi.
E programa di bakunashon ta disponibel na Departamentu di Kombatimentu di Malesanan Infeksioso (IZB) di “Uitvoeringsorganisatie Geneeskunde & Gezondheidszaken” (UO G&Gz ántes GGD).
E servisio di bakunashon na e departamentu menshoná ta segun e siguiente skema:
– Bakunashon pa COVID-19: riba djaluna, djamars, djaweps i djabièrnè di
08:00-12:00 i di 13:30-17:00.
Pa mas informashon por yama IZB na telefòn +5999 432-2860 òf +5999 661 0095
di djaluna pa djabièrnè, di 08:00-12:00 i di 14:00-17:00.
Pa mas informashon tokante di e komunikado aki por tuma kontakto ku Direktor di G&Gz dr. Melissa Arias na +5999 568-1555.
