Publiká riba 09 Novèmber 2023
Willemstad- Durante aña 2023, Minister di Desaroyo Ekonómiko, sr. Ruisandro Cijntje, huntu ku Ministerio di Desaroyo Ekonómiko (MEO) a introdusí e kampaña ‘Orea pa Empresario’. Pa medio di e kampaña akí, Minister Cijntje i MEO a drenta diferente bario di Kòrsou pa yega mas serka di e (futuro) empresario lokal. Di e forma akí, ta purba kibra e barera pa e (futuro) empresario yega na informashonnan nesesario òf hasi preguntanan. Durante kada seshon di ‘Orea pa Empresario, Minister Cijntje huntu ku e tim di maneho di MEO a yega den barionan di Kòrsou pa kòmbersá i deliberá di aserka tokante entre otro e retonan ku e empresario ta eksperensiá diariamente.Durante 2023, ‘Orea pa Empresario’ ya a bishitá Bario di Bándabou, Otrabanda i Montaña.
Djabièrnè 24 di novèmber próksimo, e último edishon di ‘Orea pa Empresario’ lo aun mas grandi ku e seshonnan anterior. Riba e fecha akí ‘Orea pa Empresario lo ta for di 11’or di mainta pa 9’or di anochi den e zona empresarial na Sambil den forma di un feria.
Ta bai tin stènt di diferente organisashon i servisio durante henter dia dunando tur informashon ku un persona por tin mester di dje pa sea realisá su soño di bira un empresario òf mehorá su empresa eksistente. Tambe lo tin diferente presentashon i momentunan pa hasi pregunta durante dia. Un i tur por bishitá e edishon akí di ‘Orea pa Empresario’ grátis durante dia i deskubrí kon pa superá e desafionan di ta un empresario i stimulá kresementu di bo negoshi.
Algu ku ta hasi e último edishon akí di aña 2023 aun mas spesial, ta un seshon ku lo tuma lugá di 6’or di atardi pa 7:30 di anochi kaminda tur 8 minister lo ta presente pa tambe deliberá ku esnan presente i kontestá preguntanan tokante bo ideanan i retonan di ta un empresario lokal.
Minister Cijntje i MEO ta invitá pueblo di Kòrsou kompletu pa bishitá e último edishon di ‘Orea pa Empresario’ 2023 i tuma tur informashon nesesario pa elevá bo negoshi na e siguiente nivel i bira e siguiente empresario eksitoso di Kòrsou.
