Publiká riba 01 Òktober 2026
2 di òktober 2026
WILLEMSTAD – E trayekto di Rib’e Lugá ku a inisiá na luna di mei ta yegando su final. Por registrá pa Rib’e Lugá te ku djasabra 31 di òktober 2026. Meta di e registrashon aki ta pa legalisá personanan indokumentá ku ta biba na Kòrsou.
E trayekto Rib’e Lugá a kuminsá dia promé di mei 2026, ku un periodo inisial di registrashon di tres luna. Segun e plan inisial, e periodo di registrashon lo a finalisá na fin di yüli 2026.
Sin embargo, mirando e gran interes di e komunidat i pa duna mas hende oportunidat pa regularisá nan situashon, e periodo di registrashon a keda alargá pa tres luna mas.
E ekstenshon aki a keda konsiderá nesesario, entre otro, pa personanan ku tabata warda dokumentonan importante pa nan registrashon. Esaki a duna e personanan mas tempu pa kompletá nan dokumentashon i hasi nan registrashon. Awor ku nos a drenta den e último luna di e trayekto Rib’e Lugá, ta importante pa personanan ku ta kualifiká i ku ainda no a registrá pa tuma akshon promé ku e periodo di registrashon kaba.
Último fecha di registrashon ta: 31 di òktober 2026
Personanan ku tabata presente na Kòrsou promé ku 13 di novèmber 2025 por bini na remarke pa e trayekto Rib’e Lugá, si nan ta kumpli ku e otro rekisitonan aplikabel.
Pa fasilitá e proseso, lo tin dia di registrashon tur e djasabra nan binidero na Servisio di Atmishon den Punda, ku eksepshon di djasabra 10 di òktober 2026. Esaki ta un oportunidat pa personanan ku ainda mester hasi nan registrashon pa haña asistensia durante e proseso.
Rib’e Lugá ta representá un oportunidat temporal pa personanan ku ta kualifiká pa pone nan situashon legal na òrdu i pa traha na un futuro mas sigur i stabil na Kòrsou.
Pa mas informashon, por tuma kontakto ku nos via WhatsApp òf telefòn na +599 9 511 9984.
No warda te último momento.
