Último oportunidat pa doñonan di standplaats pafó di sentro di siudat ku ainda no ta kumpli ku maneho di standplaats. - Informashon tokante Gobièrnu di Kòrsou Bo opinion

Notisia

Último oportunidat pa doñonan di standplaats pafó di sentro di siudat ku ainda no ta kumpli ku maneho di standplaats.

Geplaatst op 24 January 2021 dor di Ministerio Desaroyo Ekonómiko

WILLEMSTAD – Djárason 20 di yanüari último, Konseho di Minister a bai di akuerdo pa, un biaha mas, prolongá e periodo di transishon pa doñonan di standplaats pafó di sentro di siudat ku ainda no ta kumpli ku reglanan stipulá den e maneho di standplaats vigente. E periodo di transishon nobo ta kore te ku djárason 31 di mart 2021; lokual ta nifiká ku pa e fecha akí tur standplaats pafó di sentro di siudat mester ta kumpli ku e instrukshonnan stipulá den e maneho di standplaats.

Den e periodo di transishon akí, MEO ta habri e posibilidat pa asistí doñonan di standplaats ku kisas ta enkontra kualke difikultat pa kumpli ku e maneho. Te ku djaluna 1 di febrüari próksimo, e empresario aki por manda un mail na info.meo@gobiernu.cw indikando ku e mester di asistensia i MEO lo evaluá na unda i di ki forma e ministerio por yuda e doño di standplaats aki yega na kumplimentu promé ku e periodo di transishon pasa.

E proseso pa inventarisá i strukturá uso di standplaatsnan pafó di sentro di siudat ta andando for di aña 2016. Den e periodo akí, MEO huntu ku e Ministerio di VVRP a tene seshonnan di informashon i reunionnan tantu den grupo komo individual ku doñonan di standplaats eksistente pa presentá kontenido di e maneho pero tambe duna espasio pa kontestá kualke pregunta ku e empresarionan aki por ta’tin riba e maneho. 

Di e 127 standplaatsnan ku tin registrá pafó di sentro di siudat, MEO sin mas mester duna elogio na e doñonan di standplaats ku debidamente a hasi nan esfuerso i awe ta kumpli ku e maneho akí. Ta trata aki di un total di 42 standplaats. Ta di aploudí kada bes ku un empresario duna di su parti pa gana su pan den un forma ku ta kumpli ku regla i leinan eksistente di nos pais. 

Sinembargo e realidat ta, ku apesar di esfuerso i informashon di parti di Gobièrnu, ainda mayoria di e lokalidatnan di standplaats no ta kumpli kompletamente ku e maneho.

Den pasado, MEO a sinta individualmente ku kada doño di standplaats pa indiká spesifikamente kiko mester keda adaptá pa asina kumpli ku lokual tin stipulá den e maneho. Despues di esaki, a manda diferente rekordatorio inkluso un karta personal na kada doño di standplaats kaminda ta mustra bèk riba e lokenan a keda palabrá den e kombersashonnan personal. Mirando e diferente oportunidatnan ku Gobièrnu di Kòrsou a duna, entrante djaweps 1 di aprel awor tur standplaats mester ta kumpli ku e indikashonnan den e karta risibí komo ku ya lo no por bolbe prolongá e periodo di transishon akí un biaha mas.

Tur esnan interesá, por deskargá i lesa e maneho di standplaats aki den su totalidat riba e wèpsait di Gobièrnu di Kòrsou.

Ministerio konserní