Publiká riba 12 Novèmber 2025
WILLEMSTAD – Gobièrnu di Kòrsou i Ministerio di Salubridat, Medio Ambiente i Naturalesa (GMN) ta invitá tur habitante den barionan di Sta. Rosa, Saliña/Steenrijk, Jongbloed/Mahaai, Marchena/Wishi, i Otrobanda pa deshasí di nan shushinan durante e último wikènt ku bakinan di shushi grátis den region zùit.
Riba djasabra, 15 i djadumingu, 16 di novèmber próksimo, e bakinan ta aksesibel na e siguiente áreanan stratégiko for di 8’or di mainta te ku 5’or di atardi: Sta. Rosa: Seru Loraweg, Saliña/Steenrijk: SUBT, Jongbloed/Mahaai: Snipweg/Chuchubiweg, Marchena/Wishi: Palu Blanku i Otrobanda: Entrada di Roodeweg. Habitantenan por deshasí di nan shushinan kompletamente grátis. E siguiente i último region di e kampaña ‘Di bo, Pa bo, Ku bo’ lo ta ‘Zona 4: Ost’, kuminsando e wikènt di 22 i 23 di novèmber.
Resultadonan di zonanan anterior
Anteriormente tabatin bakinan di shushi den ‘Zona 1: Wèst’ i ‘Zona 2: Nort’ kaminda habitantenan a probechá di e oportunidat pa deshasí di tur nan shushinan kompletamente grátis. Den Zona 1 kual ta e área wèst di Kòrsou a rekohé un total di 148.000 kilo di shushi. Zona 2 kual ta e área nort di Kòrsou a surpasá área wèst i a rekohé na tur un kantidat di 303.300 kilo di shushi. E sifranan aki ta demostrá ku e kampaña no ta solamente eksitoso den limpiesa di Kòrsou, pero tambe ta kontribuí na un konsientisashon tokante e importansia di un ambiente limpi i sostenibel.
Trahando huntu pa un Kòrsou mas limpi
E kampaña ‘Di bo, Pa bo, Ku bo’ no ta solamente un akshon di limpiesa pero tambe un inisiativa di konsientisashon ku ta enfoká riba responsabilidat kompartí. Gobièrnu di Kòrsou i Ministerio di Salubridat, Medio Ambiente i Naturalesa ta enkurashá tur habitante pa kontribuí aktivamente, no solamente dor di deshasí di shushi korektamente i di un forma responsabel, pero tambe dor di separá shushi i brasa resiklahe.
Na momentu ku nos tur duna di nos parti, Kòrsou no ta solamente keda limpi, pero e lo ta un orguyo pa futuro generashonnan.
Un Kòrsou mas limpi ta kuminsá ku nos!
