Un brisa nobo na Kas di Kòrsou!
Publiká riba
14 Yüli 2026
WILLEMSTAD – Minister di Desaroyo Ekonómiko di Kòrsou, Dr. Roderick Middelhof, a reuní ku Minister Plenipotensiario di Kòrsou na Hulanda, Sidney “Bicho” Justiana ku a yega Hulanda i ta laborando mesora pa nos pais.
Durante e promé enkuentro akí, e dos ministernan a interkambiá pensamentu riba diferente retonan ku ta toka pais Kòrsou. Nan a deliberá tokante e relashon polítiko entre Kòrsou i Hulanda, e manera kon e dos paisnan por sigui fortifiká kooperashon, i e papel ku e Kabinèt di Minister Plenipotensiario por hunga pa habri mas oportunidat pa nos pais.
Un di e temanan importante tabata e desaroyo di turismo i ekonomia. Pa fortalesé e posishon di Kòrsou riba merkado hulandes, atraé mas invershon, i sigui krea oportunidat pa kresementu ekonómiko sostenibel. Ministernan a papia tambe riba e siguiente pilarnan ekonómiko di Kòrsou i kon por sigui diversifiká nos ekonomia pa futuro.
Minister Middelhof a indiká ku e brisa nobo na Kas di Kòrsou na Hulanda ta kai na mes momentu ku Hulanda tambe tin un gobièrnu relativamente nobo. Segun e Minister, esaki ta krea un bon momentu pa duna un impulso nobo na e relashon entre Kòrsou i Hulanda, pasobra e gobièrnu nobo a mustra disponibilidat pa fortifiká e kooperashon ku e paisnan karibense den Reino.
Durante e reunion, Minister Plenipotensiario Justiana a kompartí tambe su ambishon pa organisá e promé reunion di tur kònsulnan di paisnan latinoamerikano akreditá na Hulanda na Kas di Kòrsou. Segun e Minister, e inisiativa akí lo sirbi pa fortalese e relashon diplomátiko ku e region, amplia e ret di kontaktonan di Kòrsou i habri oportunidat nobo riba tereno di komèrsio, invershon, turismo i koperashon.
Ademas, Minister Justiana a ekspresá su pleno sosten na e esfuersonan di Minister Middelhof pa eliminá e obligashon di visa pa residente di República Dominicana ku ke bishitá Kòrsou. Segun e minister, simplifiká e proseso di biahe lo kontribuí na mas turismo, mas aktividat ekonómiko i un relashon mas estrecho entre Kòrsou i República Dominicana.
“Minister Middelhof ta sinti ku pas lo reina i trabou lo kuminsá kana bèk na Kas di Kòrsou. E entusiasmo di Minister Justiana ta hopi kontagioso i lo kontribuí pa Kas di Kòrsou tin un atmosfera ameno. Tambe Minister Middelhof ta di opinion ku e tin hopi konfiansa ku e gobièrnu nobo di Hulanda lo ta un aliado importante pa sigui impulsá oportunidatnan nobo pa Kòrsou. Ku un bon koordinashon entre Willemstad i Den Haag ta esensial pa logra resultadonan konkreto riba tereno di invershon, komèrsio, turismo i desaroyo ekonómiko.”
“Kòrsou por sinti konfiansa ku nos interesnan ta den bon man. Ku Minister Sidney ‘Bicho’ Justiana komo Minister Plenipotensiario, nos tin un representashon fuerte na Hulanda ku ta komprometé ku desaroyo di nos país.”
Minister Middelhof a sera e reunion resaltando ku e reto ta grandi, pero ku e oportunidatnan ta aun mas grandi si tur hende ta traha den e mesun direkshon.
“Esaki no ta tokante un ministerio òf un persona. Esaki ta tokante nos pais. Huntu, ku e interes di Kòrsou semper den sentro di tur desishon, nos lo sigui traha pa un futuro mas fuerte, mas próspero i mas prometedó pa kada hende ku ta yama Kòrsou kas.”
Ministerio konserní:
Desaroyo Ekonómiko
