Publiká riba 28 Aprel 2023
Willemstad- Riba petishon di Minister di Desaroyo Ekonómiko, sr. Ruisandro Cijntje, Konseho di Minister a bai di akuerdo pa kambia e destinashon di un tersera parti (⅓) di e zona ekonómiko situá na Nieuwe Haven (Koningsplein). E parti akí seguidamente lo bira un área industrial/ komersial ku lo sirbi pa aktividatnan ekonómiko manera entre otro produkshon, servisio logístiko, i servisio teknológiko. Mas di 60 empresa, tantu lokal komo internashonal, lo haña e oportunidat próksimamente di por establesé nan mes den e área industrial/komersial akí.
Nos parke industrial aktual na Brievengat ta yen pa un tempu kaba i Curinde, kende ta na enkargo di entre otro e maneho di e parke industrial akí, a indiká ku regularmente nan ta risibí mas petishon di empresanan ku ta deseá di establesé nan mes den un área industrial/komersial. Netamente esaki tabata e motibu pa kua Curinde a aserká Gobièrnu di Kòrsou na aña 2018 ku e petishon pa hasi e ahuste den e zona ekonómiko na Koningsplein pa por akapará e demanda ku ta eksistí pa un área industrial/komersial adishonal.
E petishon akí a tuma su tempu, mirando ku ta trata aki di un kambio di lei, pero finalmente Ministerio di Desaroyo Ekonómiko (MEO), Ministerio di Finansa i Curinde orguyosamente por anunsiá ku esaki a bira un realidat i ta gradisí e komishon “Modernisering Economische Zones” ku a traha duru pa por a finalisá e trayekto akí.
E sobrá dos tersera parti di e área na Koningsplein ta sigui fungi komo zona ekonómiko i lo kontinuá ku nan aktividatnan regular. E pida ku lo fungi komo área industrial komersial lo tin su propio entrada via Dokweg i e zona ekonómiko ta sigui hasi uso di e entrada via Nieuwe Haven. Próksimamente Curinde lo bai traha riba e trayekto pa modernisashon di lei di zona ekonómiko kual tambe lo kontribuí na atraé otro tipo di aktividat den e zona.
Kontrali na e lei ku ta mara kompanianan den e zona ekonómiko pa eksportá, esnan den e zona industrial komersial no nesesariamente mester ta un empresa ku e enfoke riba eksportashon. Naturalmente si un di e empresanan den e área industrial/komersial ta deseá di eksportá, nan lo por hasi esaki libremente. Empresanan establesé den e área industrial komersial akí ta mará na paga tur impuesto i OB lokual ta nifiká ku nan ta bai kontribuí aktivamente na e ekonomia di nos pais.
Photo: wèpsait Curinde
