Notisia

Paris – Willemstad. Durante su mishon na UNESCO Paris, Minister di Enseñansa,Siensia, Kultura & Deporte sra. Marilyn Alcalá-Wallé a hasi un bishita di kortesia serka sra. Stefania Giannini, Assistente Director-General pa Edukashon na UNESCO pa kombersá riba asistensia riba tereno di Enseñansa i Edukashon.

Na 2018, e UNESCO Direktor-General sra. Audrey Azoulay a apuntá sra. Giannini komo un di e kuater miembronan den e senior management tim. Sra. Giannini for di e tempu ei ta sirbi den e funshon di miembro di e tim aki i e ta un ofisial den e tòp di Nashonnan Uní den e áreanan di Enseñansa i Edukashon.

Durante di e enkuentro e mandatario, konhuntamente ku otro representantenan di Reino, kaminda alabes tabata presente Minister Plenipotensiario di Kòrsou sr. Anthony Begina i minister Armando Lampe di enseñansa di Aruba, a interkambia riba algun tema di interes komun. Un di e temanan tabata e tema di Enseñansa i e agènda di Enseñansa di Kòrsou i posibel asistensia di UNESCO.  Sra. Giannini tabata reseptivo pa e petishon i UNESCO ta sigui duna asistensia kaminda ta nesesario pa nos por logra e metanan stipulá pa logra mas desaroyo riba tereno di formashon pa nos komunidat.

Riba e foto por mira: Minister Plenipotensiario di Kòrsou, sr. Anthony Begina, Sr. Hans Wesseling, Representante Permanente di Reino na UNESCO Paris, Minister di Enseñansa sra. Marilyn Alcalá-Wallé di Kòrsou, sra. Stefania Giannini, Assistente Director-General pa Edukashon na UNESCO, Minister di Enseñansa sr. Armando (Rudy ) Lampe di Aruba i Ms Marcellia Henry. Sint Maarten National Commission.

*****************************

MAS NOTISIA

Ministerio konserní: Enseñansa, Siensia, Kultura & Deporte