Publiká riba 04 Sèptèmber 2026
Willemstad – Gobièrnu di Kòrsou ta kontentu di por anunsiá ku atraves di ’11th European Development Funds (EDF) WORKS contracts’, lo bai kuminsá hasi trabounan pa mehorá diferente bario. Union Europeo (EUD) huntu ku gobièrnu lo traha den Otrobanda, Sapate, i Fortuna Ariba. E logro aki ta marka un paso importante pa kontinuashon di e kolaborashon entre Kòrsou i Union Europeo den desaroyo di proyekto di infrastruktura esensial riba nos isla.
Proyektonan ku ta parti di e programa aki ta:
Otrobanda:
Den Breedestraat Otrobanda, Roodeweg i e bario banda di e moské, lo kambia e sistema di riolering. Aktualmente tin un sistema meskla, ku ta nifiká ku awa sushi i áwaseru ta bai huntu. E sistema nobo ta pipanan separá. Pues e awa sushi ta bai apart den e sistema di purifikashon di awa, i awa di áwaseru ta bai laman
Plenchi na pòmp di gasolin Scheidelaar:
Den e proyekto aki tambe, ta drecha e plenchi na altura di pòmp di gasolin Scheidelaar. Lo pone klenku, banki, kos di hunga, i mas.
Sapaté:
Den Sapaté ta bai drecha iluminashon pa públiko i ta hala kapa di asfalt. Durante e di 10 proyekto di EDF, a traha un sentro di bario. Den e 11 proyekto di EDF aki, ta bai finalisá e bario dor di hala e kapa di asfalt i pone iluminashon públiko. Lo agregá tambe espasio pa hunga pa mucha, i drecha e paisahe.
Fortuna Ariba:
FKP ta bai traha kas pa pueblo i VVRP ta bai traha infrastruktura, kual ta enserá riolering, klenku i kaminda di asfalt. VVRP tambe lo traha un sentro multi-funshonal.
E desaroyo aki ta un resultado di esfuerso komun di tur partidonan envolví i ta reflehá e kompromiso i trabou duru ku a invertí den e proyekto aki. Aprobashon di e kontrato ta duna un ‘boost’ importante pa Kòrsou i ta habri kaminda pa realisashon di diferente proyekto di infrastruktura ku lo tin un impakto positivo riba nos isla.
Ounke tin mas trabou pa hasi, e meta aki ku nos a yega ta un logro grandioso. Minister Charles Cooper di Ministerio di Tráfiko, Transporte i Planifikashon Urbano ta spera ku plaser pa kontinuá kolaborashon ku aktor lokal i internashonal pa yega un komienso eksitoso ku e proyekto aki.
