UOVV a kùr 7725 vehíkulo den 4 siman - Informashon tokante Gobièrnu di Kòrsou Bo opinion

Notisia

UOVV a kùr 7725 vehíkulo den 4 siman

Geplaatst op 17 June 2020 dor di Ministerio Tráfiko, Transporte i Planifikashon Urbano

WILLEMSTAD – Servisio pa Tráfiko i Transporte (UOVV) a kùr 7725 vehíkulo den e 4 simannan ku ta tras di lomba. Esaki ta for di dia ku e servisio a habri bÈk pa públiko te ku djabièrnè 12 di yüni 2020. Banda di kùr vehíkulo, UOVV a atendé 1345 duplikado i kambio di nòmber, i 514 registrashon.

Ta trahando duru pa atendé tur kliente di un forma rápido i diligente. For di na momentu ku UOVV a habri bèk, tin e posibilidat pa tur petishon bai via di email. Pa registrashon esaki ta reg.uovv@gobiernu.cw i pa kambio di nòmber òf duplikado por email na ovr.uovv@gobiernu.cw. Pa tur persona ku no tin akseso na email, UOVV a pone un buzon ku e personanan por tira nan petishon aden.

UOVV tin un retraso di kasi 2 siman den e petishonnan pa registrashon, duplikado i kambio di nòmber riba vehíkulo. Lo traha riba esakinan pa nan ta kla mas pronto ku ta posibel. Pa loke ta trata kùrmentu di vehíkulo, tambe tin un retraso di 5935 vehíkulo ku mester kùr ainda di kual nan karchi di kùr a kaduká den e temporada di “lockdown”.

UOVV ta pidi tur e personanan aki pa traha nan sita mas pronto posibel via di Bentana di Informashon na number 0800-1515 òf 839-2073 òf email na info.uovv@gobiernu.cw. Ta eksonerá tur e personanan aki di e 30 florin adishonal ku normalmente mester paga pa kùr ora ku karchi di kùr kaduká. Lo mester paga solamente 30 florin, pero esaki ta posibel te ku fin di yüli 2020.

UOVV ta gradisí komunidat pa e komprenshon i koperashon den esaki. Huntu ta traha pa alkansá e retraso ku a surgi.

Ministerio konserní