Bo opinion

Notisia

Vandalismo SDK

Geplaatst op 09 June 2017 dor di Ministerio Asuntunan General i Promé Minister

Promé Minister Eugene Rhuggenaath a tuma nota di e akto di vandalismo na  pisina di Sentro Deportivo Korsou (SDK) i ta lamentá e soseso aki profundamente. Por hasta bisa ku nos Promé Minister ta di shòk pa konstatá ku nos mes hendenan ta kibra propiedat públiko. Den e kaso aki un sentro di deporte di pueblo. Esaki probabelmente sin pensa riba e konsekuenshanan pa esnan ku ta traha pa SDK of hasi uso di e pisina. No ta muchu tempu pasá e pisina di SDK a habri su portanan bèk despues di un renobashon grandi, pa nos hende nan -espesialmente nos deportistanan i nos muchanan di skol- por disfruta di dje.

Vandalistanan a tira sushi, zeta ets. den e pisina di SDK, a distrui e borchi di nos heroe nashonal Enith Brigitha. E pisina di SDK ta dediká na dje pa su ekselensia den mundu di natashon. Enith Brigitha ta e prome Yu di Kòrsou ku a representá Reino Hulandés na weganan Olimpiko den aña 1972 na Alemania Oksidental i 1976 na Canada. Ademas, Enith Brigitha ta e promé hende muhé di koló ganadó di medaya olímpiko den natashon.

Notabel ta ku ayera tabata e kick-off di e Kongreso di Sport, organisá pa Fundashon Desaroyo Deporte Korsou (FDDK), titulá: “Integrá …, Aselerá …, Elevá” na WTC. Promé Minister Rhuggenaath a hiba palabra durante apertura di e kongreso kaminda ela enfatisá un bes mas e importansia di deportepa ku e desaroyo di un pais, i tambe ela menshoná kon orguyoso nos por ta riba nos atletanan profeshonal ku ta destaká riba nan tereno di deporte ront mundu.

Tin varios eksperto internashonal den e mundu di deporte na Kòrsou na e momento nan aki ku ta partisipá den e kongreso. Den kombersashon ku Promé Minister e ekspertonan aki a hasta ekspresá nan atmirashon pa kon un isla tan chiki por produsí tantu atleta riba nivel profeshonal internashonalmente. I tambe ku nos ta un ehèmpel pa otro pais pa loke ta trata nos manera pa atendé ku deporte. Asina rekonisiendo e importasha di esaki den kuadro di  formashon pa desaroyo di e hende e komunidat i e pais en general. Na Hulanda por ehèmpel a kita natashon for di e kuríkulo eskolar, mientras na Kòrsou ahinda e ta forma parti di nos edukashon. Algu ku nos Promé Minister ta para 100% p’e, sabiendo kiko esaki ta nifika pakonstrukshon di nos nashon.

Den e wikènt aki lo tin diferente aktividat na SDK den kuadro di e Promé Kongreso di Deporte organisá pa FDDK. Timnan di entre otro Reda Soshal ta analisando e problema i e daño ku a keda hasí na e pisina pa por resolve esaki mas pronto posibel.

Promé Minister ta hasi un yamada di kurason na nos komunidat pa huntu nos kuida nos sentronan di rekreo, edukashon i praktika di deporte. E sentronan aki ta kaminda nos ta bini huntu pa traha riba desaroyo di nos yunan, famia i bario, finalmente yega na e nashon ku nos ta desea.

Ministerio konserní