Publiká riba 26 Ougùstùs 2021
WILLEMSTAD – For di promé di yanüari 2021, mester mèldu transakshon no usual na Unidat di Inteligensia Finansiero di Kòrsou (FIU Curaçao, anteriormente MOT) via di e portal nobo pa mèldu goAML. Corsys, e portal bieu pa mèldu, ya no ta disponibel. Tur entidat ku pa lei ta obligá di mèldu na FIU Curaçao mester registrá di nobo den goAML pa por sigui mèldu.
Durante último 6 luna di 2020, FIU Curaçao a distribuí vários foyeto, anunsio, komunikado pa prensa i karta tokante introdukshon di e portal nobo pa mèldu goAML. Tur esaki pa informá entidatnan ku tin obligashon di mèldu, di e kambionan. Tambe un manual pa usuario tokante kon ta registrá den goAML a pone na disposishon di usuarionan. A publiká tur informashon riba e wèpsait di FIU Curaçao tambe: www.fiucuracao.cw. Riba e paginá prinsipal di e wèpsait tin un link ku ta kontené tur informashon tokante goAML. Resientemente FIU a publiká un vidio di instrukshon riba su wèpsait tambe tokante kon pa registrá den goAML.
Mèldumentu den e portal nobo goAML ta desviá bastante for di e sistema di mèldu den e sistema bieu. Por ehèmpel mester di mas data pa por yena e rapòrt i e vèltnan ku mester yena tambe ta diferente. Tambe mester mèldu awor na ingles. FIU Curaçao ta duna training dediká na e sektornan ku normalmente ta raportá kantidat grandi di transakshon. Pa medio di training e entidatnan a siña kon ta mèldu den e portal nobo. Awor vidionan di e training tambe ta disponibel online. Tur hende ku no a partisipá na e seshonnan di instrukshon òf un hende ku ke sigui e training un biaha mas, awor por wak e vidionan pa train nan mes riba kon raportá den e portal goAML di FIU.
Bo tin mas pregunta tokante goAML, e videonan òf ke registrá? Manda un e-mail na goaml@fiucuracao.cw. Por bishitá nos wèpsait www.fiucuracao.cw pa haña tur informashon general tokante FIU Curaçao, mèldumentu serka FIU (“tab Report”) i tambe informashon tokante supervishon dor di FIU (“tab Supervision”).
