Publiká riba 19 Mei 2026
Willemstad – Ministerio di Tráfiko, Transporte i Planifikashon Urbano (VVRP) a tuma nota di e manifestashon di 13 di mei 2026 na Domeinbeheer, organisá pa Plataforma Banda Ariba. Na e manifestashon aki, petishonarionan for di diferente parti di Kòrsou a partisipá pa demonstrá nan inkietut. Huntu, a logra yega na diferente akuerdo i paso konkreto.
Kombersashon ku e delegashon
Un delegashon di sinku representante di Plataforma Banda Ariba a reuní ku Sekretario General di VVRP, Direktor di Domeinbeheer, i e tim di maneho di Domeinbeheer. Durante e kombersashon aki, representantenan di e Plataforma a entregá un karta huntu ku un lista.
A yega huntu na 4 akuerdo konkreto:
Trabounan di Domeinbeheer
Tin diferente trabou ta tuma lugá na Domeinbeheer. Lamentablemente esaki no ta keda komuniká na komunidat. Por ehèmpel den 2025, Domeinbeheer a saka 500 diferente tipo di desishon pa otorgá tereno.
Tur petishon ta keda tratá segun e maheno i proseduranan hurídiko vigente.
E realidat ta ku e kantidat di petishon, ku tin den tratamentu, ta surpasá e kapasidat aktual di e organisashon. Esaki ta konta pa tur tipo di petishon, manera pa trese kambio den kontratonan aktual, kambio di hür pa erfpacht, i legalisashon di situashonnan eksistente. Mester bisa ku e petishonnan pa formalisá uso ilegal di tereno ta representá kasi 80% di tur e petishonnan risibí i ku den mayoria kaso ta esnan mas kompliká, loke ta pone un preshon hopi grandi riba e prosesonan den e organisashon.
VVRP ta konsiente di e echo ku na e momentunan aki, no ta atendiendo petishonnan pa tereno di gobièrnu na e manera mas deligente i tin komprenshon pa e inkietut den nos komunidat. E retonan ta hañando un karakter struktural. Na mes momentu, ta importante pa menshoná ku Domeinbeheer ta operá den sirkumstanshanan ku hopi limitashon operashonal.
Hustamente pa e motibu aki, ta trahando riba un aserkamentu mas integral pa pone e kondishonnan nesesario pa e organisashon komo totalidat por hasi su trabou mas mihó pa komunidat.
