Invershon den sektor di Hustisia ta duna resultado:
WILLEMSTAD – Minister di Hustisia demishonario, mr. Shalten Hato, a reakshoná ku preokupashon riba e situashon kontinuo di inmigrashon ilegal na Kòrsou. Segun e minister, ainda ta sinti den komunidat un persepshon ku ta fásil pa drenta i keda ilegalmente riba nos isla, pero desaroyo resien ta probá ku e realidad ta otro.
Den oranan di mardugá di 21 di mei 2025, personal atento di Wardakosta a logra interseptá un yola ilegal ku 10 persona imigrante indokumentá i un makaku abordo. E operashon a tuma lugá despues ku sistema di radar di Wardakosta a detektá e yola i e personal riba laman a aktuá rápido pa interseptá i para e embarkashon. Despues di detenshon, e persona nan a keda entregá na e departamento di Inmigrashon di Kuerpo Polisial Kòrsou, kaminda proseduranan pa deportashon lo kontinuá, segun e regla i lei vigente. Nan deportashon lo tuma lugá riba nan propio gastu, manera ta prosedé den kaso asina.
Minister Hato a indiká ku esaki ta un indikashon ku e invershonnan ku a ser hasi den mas ekipo i teknologia avansá, pero tambe den kapasidat operashonal i formashon di personal ta duna resultado konkreto. Minister Hato a agregá ku pa protehá nos frontera i mantené nos seguridat, nos mester siguí invertí tantu den aparatonan sofestiká komo den nos kapasitat humano.
Minister Hato ta ekspresá su profundo gradesimentu na personal di Wardakosta i Kuerpo Polisial Kòrsou pa nan dedikashon i akshon efektivo durante di e operashon. “Kada akshon eksitoso ta un paso más na direkshon di un Kòrsou mas sigur i ordená,” segun Minister Hato.
