Notisia

Willemstad – Riba djaluna 4 di novèmber, a tuma lugá firmamentu di un akuerdo entre Fundashon Kas Popular (FKP), Wechi Management Company, i Gobièrnu di Kòrsou, representá pa Minister Charles Cooper di Tráfiko, Transporte, i Planifikashon Urbano. E momentu aki ta marka un momentu krusial den desaroyo di área di Wechi, habriendo porta pa e kambio di plannan i aktividatnan di konstruktshon tantu sperá riba e tereno ku ta den desaroyo for di 1993 pa finalmente logra realisá. E programa ambisioso ‘Mi Kas Awor’ ta haña sosten pa bai dilanti ku forsa.

Koperashon pa bibienda sosial i mehorashon di infrastruktura

E akuerdo firmá ta pone fundeshi pa desaroyo grandi di Wechi, ku enfoke spesial riba realisashon di kasnan pagabel i sostenibel bou di e programa di ‘Mi Kas Awor’. E programa aki tin komo meta pa atendé ku falta di bibienda i mehorá bienestar di komunidat di Kòrsou. E akuerdo tambe ta inkluí revishon di Plan di Desaroyo Insular (EOP), i ta inklui tambe infrastruktura nesesario manera ampliashon di kamindanan importante i konstruktshon di dos rotònde ku lo yuda den e fluho di tráfiko i hasi e área pa ta mas aksesibel.

Ku e akuerdo aki, e partidonan a bai di akuerdo ku e gastu pa traha e dos rotòndenan pa entrada na Wechi ta pa Gobièrnu. FKP/WMC lo paga e gastunan di obra di infrastruktura den e tereno di plannan di Wechi.

“Esaki ta un esfuerso konhunto ku lo mehorá e kondishonnan di bida di e isla i promové progreso ekonómiko,” segun ir. A.E. Con, Direktòr di FKP.

Planifikashon enfoká riba Futuro i Sostenibilidat

E plan maestro pa desaroyo di Wechi a wòrdú diseña ku un bista adelantá ku ta ahustá na kondishonnan di merkado, ku sostenibilidat i protekshon di medio-ambiente komo e sentro. Solushonnan innovativo pa maneho di awa, preservashon di balornan ekológiko, i un meskla diversifiká di tipo di kasnan a keda integrá pa krea un komunidat ekilibrá i amigabel pa medio-ambiente. Tambe plannan nan ta sostené pa investigashon profundo riba merkado di kas, balornan históriko, i realisashon ekonómiko.

E esfuerso komun di FKP, Wechi Management Company, i Gobiè rnu ta subrayá importansia di desaroyo urbano sostenibel. E proyekto aki ta primintí no solamente kasnan ku ta orientá pa futuro, sino tambe un empuhe pa ekonomia lokal ku oportunidatnan nobo i mehoraahon pa komunidat di Kòrsou.

A firma:

•Minister Charles Cooper, Ministro di Tráfiko, Transport, i Planifikashon Urbano

•Señora D.J.C. Martines-Brusorio i Señor ir. A.E. Con na nomber di Wechi Management Company

•Ir. A.E. Con, Direktòr Fundashon Kas Popular

Ku e paso importante aki den desaroyo di Wechi, un fundamentu ta poné pa un futuro kaminda bibienda, sostenibilidat, i desaroyo ekonómiko ta bai man na man. E proyekto ‘Mi Kas Awor’ lo yuda Kòrsou transformá pa bira un komunidat mas habitabel i inklusivo sosialmente, i e impakto positivo lo sinti pa hopi generashon na bin.