Notisia

WILLEMSTAD – Riba 18, 19 i 20 di novèmber próksimo, Direktorado di Kontrol di Riesgo i Maneho di Kalamidat ta bai organisá pa di 10 bia e workshop tokante di “Evenementenveiligheid & Crowd Management”. E workshop lo ser duná dor di sr. Gerard van Duykeren di The Security Company i sr. Ruud van Buren di Mojo Concerts. Durante di e workshop akí partisipantenan ta bai siña kiko ta enserá e plan di seguridat pa un evenemento, kon pa hasi un evenemento mas seif posibel, kua ta e reglanan di brantwer i UBW (Unit Bijzondere Wetten), i tambe kiko nan mester hasi na momento ku tin un insidente, situashon di krísis òf kalamidat durante un evenemento grandi. Por pensa riba un situashon di pániko, mal wer òf un tragedia ku p.e. hendenan heridá.

E workshop ta duna partisipantenan e ‘tools’ nan nesesario kon pa manehá un situashon mas seif posibel teniendo kuenta ku e aspektonan di ‘crowd management security’ i komunikashon, pero tambe kon pa trahando konhuntamente ku partnernan manera brantwer, polis, ambulans i e tim di kalamidat. Na final di e workshop partisipantenan lo risibí un sertifikado.

Ora e partisipante bai kas e tin e siguiente konosementu:

• Kiko ta ‘Evenmentenveiligheid/Crowd Management’;
• Kiko ta un plan di seguridat pa bo evenemento;
• Kiko bo mester tene kuenta kuné na momento di organisá un evenemento;
• Analisá riesgonan i solushoná riesgonan na bo evenemento;
• Komuniká i traha huntu den un situashon di kalamidat;
• Reglanan ku instansianan di gobièrnu tin pa ku bo evenemento.

E workshop básiko ta tuma lugá riba 18 i 19 di novèmber i e workshop pa ekspertonan lo ta riba 20 di novèmber. E workshop básiko ta pa personanan ku awor a kuminsá organisá evento òf ku ainda no a yega di partisipá na e workshop. E workshop pa ekspertonan ta enfoká riba hendenan ku tin años ta organisá evento i ku den pasado a yega di sigui e workshop di ‘crowd management’.

Informashon general
Fecha:                         18 & 19 di novèmber – workshop nivel básiko ‘Evenementenveiligheid & Crowd Management’
Fecha:                         20 di novèmber – workshop nivel eksperto ‘Evenementenveiligheid & Crowd Management’
Orario:                         8:30 AM – 4 PM
Registrashon:             gobiernu.co/crowd-management
Idioma:                        Hulandes

Despues di registrashon lo risibí informashon adishonal i instrukshon.

Pa pregunta por manda un mail na cursus@kalamidat.cw òf www.kalamidat.cw/crowdmanagement.

MAS NOTISIA

Ministerio konserní: Asuntunan General i Promé Minister