Publiká riba 02 Desèmber 2019
WILLEMSTAD- Djadumingu último Kòrsou porfin a risibí e barku Doña Luisa den nos hafnan na Kòrsou. Doña Luisa ta un barku di e kompania naviera Don Andres kendenan próksimamente lo kubri e ruta marítimo pa transporte di produktonan entre Kòrsou i Repúblika Dominikana.
Na luna di novèmber último durante su bishita pa Repúblika Dominikana, Minister di Desaroyo Ekonómiko, sra Giselle Mc William, a konkretisá i ofisialisá e ruta Kòrsou/ Repúblika Dominikana ku e kompania Naviera Don Andres NV. Esaki lo sòru pa fasilitá transporte di entre otro fruta, bèrdura i otro tipo di produktonan for di Repúblika Dominikano direktamente pa Kòrsou, Aruba i Boneiru denter di 48 ora. Tambe e konekshon direkto aki ta hasi posibel ku produktonan for di Kòrsou, Aruba i Boneiru fásilmente lo por keda komersialisá na Repúblika Dominikana i asina yega na eksportashon di nos produktonan i alabes krea/ mantené mas kupo di trabou den e diferente sektornan.
Aparte di tur esaki, yegada di Doña Luisa ta nifiká tambe ku awor Kòrsou lo por bai fungi komo un hub komersial pa produktonan Dominikano ku ta keda eksportá pa Sur di Karibe i Union Oropeo. 
Pa tur e motibunan aki i mas, den un ambiente positivo i alegre a risibí e promé lote di merkansia abordo di Doña Luisa den nos hafnan di Santa Anna djadumingu último. Ku yegada di Doña Luisa, Minister Mc William ta bolbe enfatisá ku awor mas ku nunka Kòrsou mester traha pa konkretisá i finalisá negosiashonnan ku a bin ta tuma lugá den kuadro di un tratado komersial entre Kòrsou i Repúblika Dominikana. Konkretisashon di esaki lo por sigurá di yena e barkunan di Don Andres próksimamente ku nos produktonan lokal tambe pa e pueblo Dominikano por disfrutá di e loke nos tin di ofresé.
