Publiká riba 22 Òktober 2024
WILLEMSTAD – Riba djamars 22 di òktober 2024, Presidente di Repúblika di Sürnam, Su Ekselensia Chandrikapersad Santokhi i promé dama Mellisa Santokhi-Seenacherry, a risibí un kaluroso bon biní di Promé Minister di Kòrsou, Su Ekselensia Gilmar Pisas, na aeropuerto nashonal di Kòrsou. Esaki ta marka e promé bishita ofishal di un presidente surinameño na Kòrsou.
Presidente Santokhi a yega huntu ku un delegashon, inkluyendo e Minister surnameño di Asuntunan Eksterior, Komèrsio Internashonal i Kolaborashonnan Internashonal (BIBIS), Su Ekselensia Albert Ramdin. E bishita ta enfoká riba profundisá e relashonnan komersial, fortalesé e lasonan entre ámbos pais, i eksplorá e posibilidatnan nobo ku por benefisiá tantu Sürnam komo Kòrsou.
