Publiká riba 13 Desèmber 2022
Willemstad – Minister Charles Cooper huntu ku Servisio pa Obra Públiko (OW) ta informá ku trabounan di yenamentu di buraku den nos kareteranan ta kontinuá. Esaki ta sigui apesar ku e planta di asfalt ta sera riba djaluna awor. Lo yena burakunan ku beton na lugá di asfalt. Esaki ta pa aliviá outomobilistanan ku ta trafiká riba nos kayanan i kontribuí den e forma aki tambe na seguridat den tráfiko. Asina ku e planta di asfalt habri atrobe, lo sigui yena burakunan ku asfalt.
Minister Cooper a inisiá diferente proyekto grandi di mantenshon di kaminda den 2022, manera Don Martina Boulevard, parti di Weg naar Westpunt, Saturnusstraat, i Statius van Eps. Tambe tabata planiá pa kuminsá ku Helmin Wiels Boulevard. Pa motibu di e falta di asfalt i situashon di wer, e trabounan sufri retraso.
Banda di e proyektonan grandi aki, mester sigui yena buraku. Minister Cooper ta konsiente di e situashon di nos kareteranan i ta hasiendo lo máksimo pa trese alivio mas pronto ku ta posibel
Pa 2023, lo siguí ku ehekushon di e programa di mantenshon di kamindanan. Minister Cooper huntu ku OW ta yama pueblo danki pa e pasenshi demonstrá i ta pidi poko pasenshi mas segun ku trabounan ta kana.
