Publiká riba 20 Aprel 2026
Willemstad, 16 di aprel 2026 – Siman pasa a marka e lansamentu ofisial di Young Gobièrnu, un inisiativa enfoká riba konektá, desaroyá i fortifiká amtenar hóben den Gobièrnu di Kòrsou.
Ku e slogan “konektá, desaroyá, fortifiká”, e ret ta krea un plataforma dinámiko kaminda hóben profeshonal por topa otro, sostene otro i huntu kontribuí na futuro di nos pais.
“Huntu nos ta traha pa un gobièrnu prepará pa futuro dor di konektá, inspirá i fortalesé hóben profeshonal. Nos ret ta un lugá kaminda kresementu—tantu personal komo profeshonal—ta sentral; kompartiendo konosementu, eksperensia, siñando huntu i sosteniendo otro aktivamente.”
E inisiativa a surgi bou di liderato di Sylvie-Anne Ostiana, huntu ku un tim komprometé ku ta inkluí Chelsy Gómez Hernandez (maneho), Anjali Daryanani (HR), Marie Sophie Nunes (komunikashon), i stagiaire di HRO Tishany Cornelis. Durante un enkuentro inspirá, e idea a bira un realidat ofisial, formalisando den un grupo pa tur amtenar hoben.
Interes pa e ret a supera tur ekspektativa: mas ku 200 amtenar hoben a inskribí, di kual 75 a partisipá na e seshon di kick-off. E lansamentu a risibí sosten fuerte di ministerio di Maneho di Gobernashon, Planifikashon i Servisio Públiko (BPD).
Sekretario-General sra. Nadya Nersicio i direktor di organisashon di maneho mr. Myron Eustatius a subrayá e balor di e inisiativa i a ekspresá nan konfiansa den su impakto duradero den gobièrnu. For di ministerionan di VVRP i GMN e Sekretarionan-General mr. Dwigno Puriel i mr. Sharlon Melfor tambe tabata presente, mustrando nan sosten i kompromiso pa e inisiativa. Tambe, minister Sithree van Heydoorn (OWCS), den su ròl komo minister suplente di BPD, a aportá un diskurso inspirashonal, enfatisando e balor krusial di talento hóben den sektor públiko. El a resaltá e importansia di pone hende sentral i di rekonosé ku amtenar (hoben) ta kontribuí direktamente na bienestar di komunidat.
Tambe el a pone énfasis riba e nesesidat di perspektiva moderno i atrakshon di mas profeshonal hoben den futuro. 
E mainta a wòrdu moderá pa sra. Corine Clementina-Blom, ku su estilo enérgiko i komprometé, ku a kontribuí di un forma balioso na e eksito di e enkuentro.
For di e seshon interaktivo ku partisipantenan, a sali algun señal kla:
Young Gobièrnu ta dirigí na amtenar hóben ku ke progresá, amplia nan ret i kontribuí aktivamente na fortifikashon di e aparato gubernamental. E plataforma lo fasilitá desaroyopersonal i profeshonal, kolaborashon i kompartimentu di konosementu, ku e meta komun: un Kòrsou mas prepará pa futuro.
Ku e lansamentu aki, un paso importante a ser tuma den direkshon di un gobièrnu mas konektá, inklusivo i orientá riba futuro.
E siguiente evento di Young Gobièrnu ta planifiká pa mei 2026.
