5.6 mion florin pa mantenshon di tres skol na Kòrsou

Willemstad/Den Haag – Resientemente minister di Enseñansa, Kultura, Siensia i Deporte sr. Sithree van Heydoorn a keda informá ku gobièrnu hulandes a pone mas ku 5.6 mion florin disponibel pa trabounan di mantenshon na tres skol na Kòrsou, esta: Kolegio Erasmo, Skol Prof. Dr. Nelly Winkel i Skol Cola Debrot. Ku e medionan finansiero aki por drecha e skolnan. Den e Pakete di Pais tin entre otro 30 mion euro ku ta destiná pa mantenshon di edifisionan di skol. Na 2021 a pone alrededor di 1 mion florin disponibel pa trabounan di mantenshon ku urgensia, manera reparashon di dak ku ta lèk i kambio di tualèt.

“Enseñansa ta hopi importante, e ta e base riba kua bo ta konstruí henter bo bida. Bo mester por haña e enseñansa ei den un edifisio agradabel. P’esei Hulanda a pone sèn disponibel den e Pakete di Pais. Mi ta haña bunita pa mira ku e promé tres skolnan ta benefisiá di esaki”, segun sekretario di estado Alexandra van Huffelen di Relashonnan den Reino.

Promé ku e mantenshon menshoná por a kuminsá a hinka hopi tempu i energia den trabou preparatorio. Den e kuadro ei a yega na kombenio ku Ministerio di Enseñansa, Siensia, Kultura i Deporte di Kòrsou ta karga e responsabilidat final pa realisashon di e trabounan di mantenshon (retrasá) na edifisionan di skol. Tambe e ta sòru pa bon atministrashon finansiero i operashon diario di ehekushon di e trabou di mantenshon na e edifisionan di skol.  E minister di Enseñansa, Siensia, Kultura i Deporte ya a introdusí un norma di mantenshon pa edifisionan di skol ku ta ankrá den lei. Banda di esei a establesé un organisashon di proyekto konhunto ku ta prepará e petishonnan di supsidio, kordiná e mantenshon i ta duna kuenta i rason tokante e gastunan i e kalidat di e mantenshon. Den e kuadro aki a traha un plan di proyekto detayá pa kada skol pa por eliminá e mantenshon atrasá i alsa e nivel di e edifisionan di skol na e norma di mantenshon. Pa medio di e plan di proyekto por drecha e skolnan pa nan ta den semehante estado pa despues por tene nan na e nivel deseá ku mantenshon struktural mes.

Minister Van Heydoorn di Enseñansa, Siensia, Kultura i Deporte ta kontentu ku e trabounan i ta uni su mes den e importansia di un plan di mantenshon duradero i edifisionan di skol safe pa e medio ambiente di enseñansa di alumnonan. Minister Van Heydoorn: “Nos muchanan tin derechi riba bon enseñansa. Skolnan mester ta aksesibel i sigur pa alumno i dosente. Mi ta orguyoso di e trabou di preparashon bou di guia di mi ministerio e ta yama gobièrnu hulandes i e direktivanan di skol danki pa nan kontribushon. E preparashon pa trabou di mantenshon pa diferente edifisio di skol ta sigui. Bon enseñansa ta un prioridat di nos gobièrnu i den esei nos mester keda invertí pa tantu nos dosente komo nos alumnonan.”

Tep pa lesa:

• Eindrapport Bouwstenen strategisch onderwijshuisvestingsplan Curaçao

MAS NOTISIA

Ministerio konserní: Enseñansa, Siensia, Kultura & Deporte