Adaptashon lei di tráfiko pa pèrmití penetrashon di lus den vehíkulo te ku un minimo 35% - Informashon tokante Gobièrnu di Kòrsou

Adaptashon lei di tráfiko pa pèrmití penetrashon di lus den vehíkulo te ku un minimo 35%

Ministerio konserní Tráfiko, Transporte i Planifikashon Urbano
 

Adaptashon lei di tráfiko pa pèrmití penetrashon di lus den vehíkulo te ku un minimo 35%

Publiká riba 29 Sèptèmber 2022

Willemstad – Ministerio di Tráfiko, Transporte i Planifikashon Urbano (VVRP) ta informá ku, manera ya konosí, entrante 23 sèptèmber 2022 ta pèrmití pa plak material di tint riba e bentananan dilanti di un vehíkulo, basta ku ta mantené e norma di penetrashon di lus te ku un mínimo di 35%.

Dia 14 sèptèmber 2022, pa medio di dekreto 2022/110, a trese un kambio den e lei di tráfiko pa definí un asina yamá ‘lichtdoorlaatbaarheidsnorm van voorzijruiten’.

VVRP ta enfatisá ku e kambio di lei aki no ta konta pa “Windshield”! Ta prohibí pa plak material pa tint riba ‘windshield’. Esaki ta pa por garantisá e visibilidat máksimo di e shòfùr.

Konformé e kambio di e lei aki, Servisio pa Tráfiko i Transporte (UOVV) ta midi tur bentana dilanti ku tin tint material riba dje pa verifiká ku esaki ta kumpli ku e lei, esta un norma di mínimo 35% di penetrashon di lus.

Mirando e gran kantidat di preguntanan risibí, UOVV ta splika ku normalmente un vehíkulo ku bin for di fabrika, spesifikamente e glasnan di e bentananan dilanti, ya tin un margen di penetrashon di lus kaba, sea 70% òf 75%. Pues na momentu ku awor ku e lei a kambia, un doño laga plak un material di 35%, por resultá ku esaki ta bira mas skur ku e mínimo, esta 35%. Mirando esaki, UOVV ta rekomendá tur persona ku tin deseo pa apliká e tint material aki riba nan bentananan di dilanti, pa uza un tint material di 50%. Di e forma aki, e keda den e márgen pèrmití.

Tambe ta informá pues ku awor, mirando e kambio di lei, no mester pidi eksonerashon mas pa tint e bentananan dilanti di un vehíkulo.