Publiká riba 28 Mart 2022
Willemstad – Resientemente Minister di Desaroyo Ekonómiko a reuní ku representantenan di e kadena di importadónan (BVCA), supermerkadonan (SUVECO), CPA, CPS i tambe profeshonalnan di Ministerio di Desaroyo Ekonómiko (MEO) pa asina garantisá ku por keda suministrá komestibel i kuminda na Kòrsou durante di e temporada di krísis okashoná pa e situashon di krisis i geo-polítika na nivel mundial.
Relashoná ku esaki CPA riba petishon di Minister Cijntje a hasi uso di su kontaktonan pa a logra ku e liña di CMA-CGM a charter un barku pa por trese kònteinernan destina pa Kòrsou ku ya tabatin kasi 2 luna pegá na Jamaica. E promé lote di 106 kònteiner a yega Kòrsou den e wikènt 26-27 di mart último.
Mas aleu a logra tambe ku e liña menshoná lo re- establesé e konekshon di karga semanalmente atrobe. Pa motibu di skarsedat di barku esaki a ser interumpí den e último dos lunanan. Aparte di CMA-CGM tambe esfuerso ta wordu hasi ku e diferente otro liñanan di barku di kontenedor ku ta duna servisio na nos pais manera Seatrade. Di e forma aki Minister di Desaroyo Ekonómiko, Ruisandro Cijntje, ta kumpliendo ku su meta pa por garantisá seguridat di aksesibilidat di alimento pa komunidat di Kòrsou.
Minister Ruisandro Cijntje, lo presentá riba término kòrtiku un plan di kontigensia pa garantisá siguridat di alimento, si mester resultá ku e konflikto geo-polítiko kousa eskases. Minister a reuní ku tur ministerionan konserní I ta deliñando un strategia pa pèrkurá suministro di komestibel I kombustibel pa nos pais.
Minister di Desaroyo Ekonómiko a duna su ministerio tarea pa drenta den kontakto ku proveëdornan i Gobièrnunan den regionmanera por ehèmpel Colombia, Brasil i otro merkadonan pa asina por suavisá nos dependendensia di Oropa.
Un otro akshon riba término kòrtiku di e Minister huntu ku tur e stakeholdersnan envolví ta pa yega na palabrashonnan ku mester resultá den optimalisashon di e kadena logístiko. Esaki lo mester kontribuí na un situashon bentahoso pa tur e stakeholdersnan i tambe pa e pueblo di Kòrsou.
Riba término mediano lo bini ku sugerensianan pa por fasilitá empresanan den e área di agrikultura pa alsa nan produkshon. Esaki lo tuma lugá den koperashon ku Minister di Salubridat, Naturalesa i Medio Ambiente, ku e meta pa oumentá e seguridat di alimento na Kòrsou.
Minister di Desaroyo Ekonómiko mediante di e komunikado aki, ta informá nos pueblo ku aktualmente no tin eskases i ku pueblo por ta trankil mirando e esfuersonan grandi ku ta hasiendo pa evitá esaki.
