Publiká riba 05 Mart 2023
Na tur e dos Universidatnan, ya tin studiantenan di Kòrsou ku ta studia einan. E delegashon di Kòrsou tabatin e oportunidat pa a interkambiá ku e studiantenan, pa asina konosé nan eksperensha pero tambe nan retonan. Ta bon pa informá ku ya na Kòrsou nos tin mas ku 20 studiante ku a terminá nan estudio di dòkter na Costa Rica. E delegashon di Kòrsou tambe a bishitá e Universidat de Ciencias Médicas (UCIMED), ku ta un Universidat ku ya pais Kòrsou tin un akuerdo firmá kuné. I ku aktualmente tin un kantidat di 35 studiante di Kòrsou ta studiando. E fakultat médiko di UCIMED ta keda manehá pa un Arubiano ku a studia na i gradua na e Universidat mes i ku ta señor Sprok.
Na tur e Universidatnan aki, ya nan no ta hasi uzo di kuerpo humano pa e studiantenan práktika medisina riba, pero e práktika ta tuma lugá ku pòpchinan komputarisá ku por simulá e diferente situashon nan di un kurpa humano. E delegashon di Kòrsou a keda impreshoná pa kalidat di e material ku e Universidatnan aki ta hasi uso di dje. Ta bon pa menshoná ku e Embahador di Reino Hulandes na Costa Rica sra. Christine Pirenne a kompaña e delegashon di Kòrsou na tur e enkuentronan. E riba djabièrnè anochi e Embahador a organisá un sena na su kas pa e delegashon di Kòrsou por a sera konosí i dialogá ku Minister di Enseñansa di Costa Rica ku ta sra. Katharina Muller. Huntu ku e sra. K. Muller, tabata presente outoridatnan na nivel haltu di enseñansa di Costa Rica. Sra. Katharina Muller tin un karera impreshonante den diferente funshon ku su persona a okupá den organisashon mundial i paisnan di Latino Amérika. Tabata un honor pa e delegashon di Kòrsou di por a interkambiá kuné riba vários tema relashoná ku enseñansa.
Manera ya nos a informá meta di e akuerdonan aki ta pa nos studiantenan, studia mas serka di kas i asina regresá bèk nan pais i tambe pa evitá mas “brain drain”. Ku esaki Ministerio di ESKD ta sigui traha na bienestar di nos enseñansa, kaminda ta sigui krea oportunidat di studio den region.
—
Sithree van Heydoorn
Minister di Enseñansa, Siensia, Kultura I Deporte
** riba e potrètnan athunto por tuma nota di e momentu ku a firma akuerdonan ku e 2 Unversidatnan na Costa Rica.