Publiká riba 21 Yüli 2026
Oranjestad/Willemstad 21 di yüli 2026, Minister di Enseñansa, Siensia, Kultura i Deporte di Kòrsou, Sr. Sithree van Heydoorn, i Minister di Enseñansa i Deporte di Aruba, Sra. Gerlien Croes, a firma na Oranjestad un Memorandum of Understanding (MoU) pa fortalesé kolaborashon riba digitalisashon di gobièrnu, digitalisashon di enseñansa i formulashon di maneho basa riba datonan. Ku e akuerdo aki, Aruba i Kòrsou ta reforsá nan kolaborashon den Reino Hulandes riba transformashon digital di gobièrnu i sektor di enseñansa.
E kolaborashon ta enfoká riba, entre otro, digitalisashon di enseñansa, sistema di informashon edukativo, formulashon di maneho basa riba datonan, “dashboard” ku informashon di enseñansa, registro di diploma, sistemanan di siguimentu di alumno, interkambio di dato entre registronan gubernamental i servisio digital pa siudadanonan.
Un parti importante di e akuerdo ta e interkambio di konosementu i eksperensia. Kòrsou a desaroyá e Centraal Landelijke Onderwijs Applicatie (CLOA), miéntras ku Aruba ta trahando riba e desaroyo kontinuo di un gobièrnu digital moderno i sistema di interkambio di dato entre diferente servisionan públiko. Dor di kompartí eksperensianan, tur dos pais por benefisiá di e progreso, konosementu i invershonnan di otro.
E akuerdo ta alinea ku e metanan di digitalisashon den e “Landspakket” i ku e akuerdonan ku ta ser hasí den e “Vierlandenoverleg” riba enseñansa, inovashon i konosementu.
Minister Sithree van Heydoorn a bisa:
“Bon enseñansa i bon gobernashon ta kuminsá ku informashon konfiabel. Dor di kompartí konosementu i eksperensia, nos ta fortalesé tantu nos sistema di enseñansa komo e kalidat di nos servisio públiko.”
Minister Gerlien Croes a agregá:
“Dor di traha huntu nos por siña mas lihé, traha mas efisiente i logra mihó resultado pa nos siudadanonan.”
Ku e firmamentu di e akuerdo aki, Aruba i Kòrsou ta konfirmá nan kompromiso komun pa sigui invertí den un gobièrnu moderno, inovador i prepará pa futuro, kaminda digitalisashon ta kontribuí na un enseñansa di kalidat, gobernashon transparente i mihó servisio na e komunidat.
