Bishita di beisbolista profeshonal sr. Ceddanne Rafaela - Informashon tokante Gobièrnu di Kòrsou

Bishita di beisbolista profeshonal sr. Ceddanne Rafaela

Ministerio konserní Enseñansa, Siensia, Kultura & Deporte
 

Bishita di beisbolista profeshonal sr. Ceddanne Rafaela

Publiká riba 31 Òktober 2023

WILLEMSTAD – Minister van Heydoorn a risibí e hóben profeshonal sr. Ceddanne Rafaela na su ofisina i a interkambiá di punto di bista ku e hóben akí. Ceddanne Rafaela ta un yu di Kòrsou beisbolista ku ta forma parti di MLB den e tim di Boston Red Sox. E hóben prospekto akí a kòmbersá ku minister i duna konseho kon engrandesé e deporte di beisbòl riba nos isla.

Sr. Ceddanne Rafaela a kompartí ku el a kuminsá na aña 2012 komo pelotero i miembro di Liga Willemstad. Despues el a representá e region di Karibe den Little League World Series. For di ei tabatin bista riba dje i na 2017 el a firma ku Boston Red Sox. Tambe el a pasa den diferente entrenamentu i a debutá na 2018 den Liga Dominikano Red Sox. Asina el a sigui krese i awe e ta den MLB komo un beisbolista/outfielder profeshonal.

Komo muestra di apresio, minister a entregá un obra artístiko di sr. Giovanni Abath na e hóben atleta. E obra 7.1 ta un arte kaminda tin un persona ta karga Kòrsou. Esaki ta simbolisá e hóben ku ta karga nos pais dignamente komo un embahador di nos nashon ku su talento. Minister enkargá ku deporte sr. Sithree van Heydoorn a keda masha kontentu ku e bishita i a deseá e hóben pelotero tur klase di éksito kos den su karera profeshonal.

KOMUNIKASHON

**Riba e potrèt por tuma nota di e bishita.