Bishita na skolnan den kuadro di e aanbesteding pa pènel solar na skolnan di Kòrsou - Informashon tokante Gobièrnu di Kòrsou

Bishita na skolnan den kuadro di e aanbesteding pa pènel solar na skolnan di Kòrsou

Enseñansa, Siensia, Kultura & Deporte
 

Bishita na skolnan den kuadro di e aanbesteding pa pènel solar na skolnan di Kòrsou

Publiká riba 20 Mei 2026

Willemstad – Den kuadro di e ‘Programa Mehorashon di Enseñansa Kòrsou’ di Minister di Enseñansa, Siensia, Kultura & Deporte, Sithree van Heydoorn, e siman aki ofisialmente a kuminsá ku e bishita di inspekshon di kondishon na skolnan pa e instalashon di pènel solar. E bishitanan aki ta forma parti di e trayekto di destaho pa un proyekto grandi di sostenibilidat den enseñansa na Kòrsou.

E ‘Programa Mehorashon di Enseñansa Kòrsou’ tin komo meta pa mehorá e kalidat di enseñansa di un manera struktural i ta dirigí su mes, entre otro, riba pilarnan importante manera oportunidatnan den enseñansa, kalidat básiko, igualdat di oportunidat i mehorashon di infrastruktura di skolnan. Den e periodo ku a pasa, gobièrnu a tuma diferente paso pa atendé e mantenshon atrasá na diferente edifisionan di skol.

Miéntras ku den e ‘Programa Mehorashon di Enseñansa Kòrsou’ tin diferente trayektonan ta kore paralelo, un fase importante di e programa ta enfoká aktualmente riba e problemátika di kalor den skolnan. Temperatura haltu den klas tin un influensia direktamente riba e ambiente di enseñansa. Pa atendé e problemátika aki di un manera sostenibel, a skohe pa un maneho den fase kaminda promé a hasi un inventarisashon di tur skolnan su infrastruktura pa investigá tur lokal na kada skol i tambe traha un dashboard pa asina por tin tur dato di e situashon di e skol i su nesesidat pa infrastruktura. Awor ku esaki ta kla, lo inisiá e proseso pa instalá pènel solar riba daknan di skolnan, siguí pa instalashon di sistemanan di èrko.

Dor di hasi uso di energia solar, lo evitá ku skolnan lo wòrdu konfrontá ku gastunan adishonal di energia komo resultado di uso di èrko. Den hopi kaso, skolnan lo por te asta benefisiá di gastunan di energia mas abou ku anteriormente.

E bishitanan aki a kuminsá e siman aki i ta spera pa dura mas o ménos dos siman. Durante e periodo aki, e partisipantenan na e destaho ku a logra pasa e promé fase di e trayekto di pre-kualifikashon lo haña oportunidat pa bishitá tur skol pa instalá pènel solar. Basá riba e bishitanan aki, nan lo por prepará un oferta tékniko i finansiero bon fundamentá.

Gobièrnu tin intenshon pa kumpra e pènel solarnan via e kapitaaldienst i realisá e proyekto den fase durante un periodo di tres aña.

Ku e proyekto aki, e ministerio ta duna un otro paso importante den direkshon di un sistema di enseñansa prepará pa futuro, kaminda invershonnan sostenibel ta kontribuí na mihó kondishonnan di enseñansa pa tur alumno i empleadonan den enseñansa na Kòrsou.