Publiká riba 10 Ougùstùs 2022
CTA – Management a organisá diferente aktividat ku un konsepto diferente i inovativo. Minister di OWCS a tene reunion ku tantu AGKK ku ta e organisashon ku ta representá gruponan di Karnaval i tambe Grupo JAC ku durante di e último 3 marchanan a organisá karnaval pa gobiernu di Kòrsou. Tur dos organisashon a manifestá nan disponibilidat pa sostené Manchi den organisashon di Karnaval 2023. Awor ministerio di ESKD ta bai atendé e parti formal pa konkretisá e akuerdo ku CTA – Management, konforme nos leinan pa por traspasá e fondonan ku gobiernu ta pone disponibel pa organisashon di karnaval 2023.
Pronto sektor di Kultura i Deporte ku sosten di nos universidatnan, University of Curacao (UoC) i Inter-Continental University of the Caribbean (ICUC) ta tene un simposio riba Karnaval pa yega na un plan stratégiko pa maneho di Karnaval di Kòrsou pa e próksimo 5 añanan. E título di e simposio ta, “Un Karnaval Duradero i Sostenibel pa Kòrsou”. Na e simposio aki tur “stakeholders” ta partisipá, pa asina por debatí i yega na konklushonnan ku ta kontribuí na desaroyo ekonómiko, kresementu sostenibel i inovativo pa Karnaval komo un produkto kultural ku ta sostené turismo kultural di un forma duradero.
Minister di ESKD sr. Sithree van Heydoorn ta deseá Manchi, hopi éksito ku e reto di organisá Karnaval 2023 i na pueblo di Kòrsou nos ta konta ku bosnan kontribushon pa un Karnaval 2023 eksitoso i un komportashon eksepshonal.
—
Sr. Sithree van Heydoorn
Minister di Enseñansa, Siensia, Kultura i Deporte
**************************************