Publiká riba 16 Mei 2023
WILLEMSTAD – Resientemente Ministerio di Enseñansa, Siensia, Kultura i Deporte (ESKD) a risibí un total di 18 profeshonal di enseñansa di San Andres, Colombia. E delegashon a bin den kuadro di e bishita anterior di e Gobernador sr. Everth Hawkins Sjogreen di e Departamentu di Archipiélago di San Andres, Provinsia Santa Catalina, Colombia. E delegashon di profeshonal a konta ku presensia di kolaborador di maneho gubernamental, administrador edukatiko, maestro di pre-eskolar, dosente di enseñansa di fundeshi i di enseñansa sekunario. E grupo a keda guiá pa e sektor di enseñansa i siensia huntu ku Dijkhoff learning.
E isla aki ta den Karibe pero ta forma parti integral di Colombia. E partikularidat ta ku na e isla aki nan ta papia 3 idioma ofishal ku ta Kriol, Ingles i Spaño. Nan idioma kriol ta un miskla di ingles, spaño i idiomanan indígena afrikano. Esaki ta mustra riba e parti multi kultural ku ta similar na nos islanan den Karibe ku ta papia mas ku dos idioma. E delegashon a bin di bishita pa haña mas informashon di maneho di idioma den e área dienseñansa i tambe haña mas datos di e desaroyo di material pa skol den vários idioma. Durante dimas o mènos 1 siman nan a keda nos isla i a bishitá vários skol i organisashon kultural.
—
KOMUNIKASHON
**Riba e potrèt athunto por tuma nota di e bishita i resepshon huntu ku minister di ESKD sr. Sithree van Heydoorn. Pa mas potrèt por bishitá: Bishita di San Andres – Colombia
