Disiplina Konsiente

Enkuentro di informashon na stakeholder, tokante Conscious Discipline

dia 22 yüni 2023

Un bon tardi i un bon biní na tur stakeholders i koleganan di Ministerio ku ta presente.

Ministerio di ESKD tin un ròl prominente den formashon di nos kapital humano. Komo titular di ESKD mi tin e privilegio di tin den mi Ministerio un team di profeshonal, ku for di un aserkamentu holístiko riba desaroyo di ser humano, a tuma e inisiativa di presentá na  Sekretario General i tim di maneho, Inspektor General i mi persona,

• un projectplan ku tin e ambishon pa Ministerio di ESKD fungi komo katalisador
• pa implementá un aserkamentu pedagógiko uniforme i kontinuo

1. den nos edukashon pre-eskolar (ku ta kai bou di UCS),
2. den nos skolnan di fundeshi regular i speshal (ku ta kai bou di UOW),
3. i den nos institutonan di naschoolse opvang (ku ta kai bou di UCS)

Ta asina ku un koperashon interno den mi Ministerio, entre UOW, UCS i Beleidsorganisatie, ta na base di e vishon i plan di implementashon ku un djis aki lo mi laga boso tende mas detayes for di profeshonalnan ku mi tin e privilegio di tin komo kolega den mi Ministerio.

Mi ke tene mi introdukshon al kaso, i p’esei mi ke pone énfasis riba algun punto. Nos Lei di enseñansa di fundeshi ta bisa ku propósito di e enseñansa di fundeshi ta:

a) desaroyo di potensial intelektual

b) formashon sosial-emoshonal i

c) formashon di suidadano komo miembro di sosiedat, pa asina nan partisipashon den sosiedat por ta unu produktivo pa asina nan mes por impulsá nan mes kalidat di bida

Na inisio mi a indiká kaba ku Ministerio di ESKD tin un ròl prominente den formashon di nos kapital humano.

• Ora nos lesa i komprende nos Lei di enseñansa di fundeshi ta bira obvio ku nos enseñansa di fundeshi, meskos ku ta e vishon di e tim di profeshonal den mi Ministerio, tambe tin komo base un aserkamentu holístiko riba desaroyo di ser humano.
• Enseñansa di un País ta exitoso ora tur e aspektonan di desaroyo ku mi a menshoná anteriormente keda sirbí; e mester resulta den un adelanto signifikante ku ta impulsá e formashon total i integral di kada individuo.
• Pero mester tene debido kuenta ku kada individuo ta úniko pues riba kada un di e aspektonan aki kada persona tin su mes punto di salida.
• Adelanto sientífiko riba konosementu di funshonamentu di e selebro humano a bin konfirmá ku formashon sano di hende ta den un relashon estrecho ku e forma ku nos ta usa e potensial ku selebro humano tin.
• Tin algun nesesidat universal i esei ta:

1. komo menor di edat lanta, wòrdu eduká i formá den un ambiente sigur i sosial-emoshonalmente sano
2. den kual adulto tin e responsabildat primordial di siña regulá nan propio emoshonnan

Un djis aki lo mi duna palabra na e siguiente orador di awe, kaminda e lo por ilustrá di forma mas konkreto kon huntu nos por krea e ambiente sigur i sosial-emoshonalmente sano, ku ta nesesidat básiko di tur ser humano.

Mi a komprendé ku e método Conscious Discipline ku ta Evidence Based, i ku ta keda praktiká kaba pa mas ku 10 aña na hermana Isla Aruba, ta un forma

1. hopi práktiko,
2. hopi hands-on, i
3. hopi solution focused

pa ehekutá un kurìkulo pa formashon sosial-emoshonal den nos institutonan pre-eskolar, skolnan di fundeshi regular,  skol di fundeshi spesial i tambe nos instititonan di naschoolse opvang.  Esaki ta kuadra ku e vishon tras di skolnan amplio, además ku esaki ta trese nos kada dia mas serka di realmente kumpli ku propósito di nos Lei di enseñansa di fundeshi ku ta formashon total di e individuo. Leinan den benefisio di mucha, ta derechi di mucha i mester vigilá pa esakinan keda kumplí.

Mi ta sigur ku boso tur presente ya kaba ta sinti ku akshonnan pa impulsá formashon sosial-emoshonal lo mester krese bira un desaroyo denter di mas Ministerio pero tambe serka tur stakeholder den nos sosiedat.  Tin un punto ku ami mes a siña kaba; den palabranan di Conscious Discipline:

• It’s an adult first transformational process. (Ta un proseso transformashonal ku ta kuminsá serka adulto promé)

Un di e benefisionan mas grandi ku un menor di edat por tin ta pa e keda eduká i formá dor di adulto ku habilidat pa regulá nan mes emoshonnan. Mi ke invitá kada un di boso presente, i tambe esnan ku boso lo sá di influenshá positivamente pa ban bira ainda mas positivo ku nos ta kaba i adulto ku habilidat pa regulá nan mes emoshonnan. Esei ta un di e miho regalonan ku nos por duna kualkier otro ser humano, sea ku e ta menor o mayor di edat.

Komo Minister di ESKD mi ke rekonosé e bunita desaroyo ku ta motibu di e enkuentro di awe.

—

Sr. Sithree van Heydoorn

Minister di Enseñansa, Siensia, Kultura i Deporte

Pa potrèt di e enkuentro bishitá: Seshon Informativo Disiplina Kosiente