Diskurso di Minister enkargá ku Enseñansa relashoná ku apertura di aña Eskolar 2022/2023

Muchanan, mayor, trahadónan den enseñansa, direktivanan di skol, sindikatonan, empresarionan, pueblo di Kòrsou, bonochi…..

Ya ta hasi algu mas ku un aña, ku mi a asumí e responsabilidat komo Minister di e ministerio di Enseñansa, Siensia, Kultura i Deporte, ku e firme intenshon pa drecha e kalidat di enseñansa. Enseñansa ta toka kada un di nos komo yu di Kòrsou, nos tur sa kon importante enseñansa ta pa desaroyo di nos komo hende, esta komo un bon yu di Kòrsou patriótiko.

Mi a skohe pa asumí e responsabilidat aki pasobra mi ta konvensí ku a bira tempu pa Kòrsou haña un sistema di enseñansa ku berdaderamente ta sirbi desaroyo i progreso di kada yu di Kòrsou. Mi ta sinti mi honrá ku partidonan di koalishon a konfiami ku e enkargo noble aki pa mehora enseñansa na Kòrsou.

Dia 11 di ougùstùs próksimo ta kuminsá un aña eskolar nobo, mi sa ku hopi di boso lo bisa ku ta djis un mas aña eskolar mas. Pero awe mi ta dirigí mi mes na boso pa anunsiá ofisialmente ku e aña eskolar nobo ku ta bai kuminsá lo ta un aña eskolar partikular. Aña eskolar 2022 – 2023 ta marka komienso di e “Operashon di Mehorashon di Enseñansa na Kòrsou”. Mi ta kontentu ku awe, den porta di komienso di e aña eskolar nobo, mi por splika kiko ta spera durante e aña eskolar nobo aki den kuadro di “Operashon di Mehorashon di nos Enseñansa”. Pueblo di Kòrsou, inspirá i guiá  pa e lema ariba menshoná mi lo hiba un maneho di enseñansa, pa yega na un mihó enseñansa pa nos yunan. Un maneho kaminda nos yunan lo haña un mihó enseñansa ku ta permití nan desaroya tur nan potenshal. Esaki ta nifiká ku mi maneho mester ta transparente i mester ta basá riba envolvimentu di tur esnan ku por kontribuí na mehorashon di nos enseñansa sin tin otro interes.

Ta p’esei na komienso di kada aña eskolar, mi kier anunsiá kiko pueblo por spera  den e aña eskolar binidero pa na final di e aña eskolar mi responsabilisá, kiko nos a realisá i kiko nos no a logra realisá. Pa asina por stipulá e akshonnan pa e siguiente aña.

Manera nos tur por a ripara enseñansa tin un lugá spesial den e akuerdo di gobernashon di Gabinete Pisas. Nos kier mustra ku esaki ku un bon enseñansa ta importante pa por realisá tur loke tin para den e akuerdo di gobernashon pa asina tur siudadano di Kòrsou por desaroyá spiritualmente, mentalmente, físikamente i kulturalmente. Enseñansa mester krea un siudadano kulto, ku por funshoná den nos mundu global i ku ta dominá e abilidatnan di siglo 21. E akuerdo di gobernashon ta preskribí ku mi mester hasi esaki basá riba e metanan stratégiko di nos gobernashon manera un kalidat di bida haltu, un koheshon sosial, un gobernashon demokrátiko efektivo i efikas ku ta operá mas serka di pueblo.

Pa por kumpli ku mi enkargo pa mehorá enseñansa na Kòrsou, mi a bai di akuerdo pa realisá un “nulmeting” amplio riba e situashon di nos enseñansa. Ta mas ku kla, ku pa sa kiko nos mester mehorá den nos enseñansa, nos mester tin un bista kla kon e situashon aktual den nos enseñansa ta.

Bou di liderazgo di nos inspekshon di enseñansa i den estrecho koperashon ku inspekshon di enseñansa di Hulanda i ku koperashon di “stakeholders” nan nos a yega asina leu ku ya tin un rapòrt preliminar i nos a publiká esaki pa tur hende tin akseso na dje. Ta p’esei kier hasi un apelashon riba kada un di bosnan pa lesa e rapòrt aki i duna bo kontribushon pa medio di sugerensia pa mehorashon di nos enseñansa promé ku 1 di òktober na e direkshon di mail adrès onderwijscuracaonulmeting@gmail.com.

Nos mester bin ku reformanan signifikante riba tur área ku ta influensiá kalidat di nos enseñansa manera Organisashonnan Institushonal, Kontenido, Infrastruktura, Metodologia, Teknologia i Profeshonalisá tur esnan ku tin un tarea riba e tereno di enseñansa i edukashon manera gobièrnu a primintí den e akuerdo di gobernashon.

Pueblo di Kòrsou, ta bon pa mi asentuá ku durante aña eskolar 2022/2023 énfasis di nos esfuersonan lo konsentrá riba e operashon pa traha e pakete di mas aña di mehorashonnan integral di nos enseñansa pa asina nos enseñansa berdaderamente por sirbi desaroyo di tantu e yu di Kòrsou komo di nos Pais.

Ta pa e motibu aki, komo parti di mi maneho mi ta anunsiá ku den kurso di e aña eskolar aki nos lo efektuá e siguiente medidanan di optimalisashon di nos enseñansa:

E promé pakete di medidanan ta dirigí riba e mucha, esta pa yuda skol yuda su alumno i asina evitá drop out;

• Detektá mas tempran si un mucha ta kai atras den su proseso di siñamentu;
• Fortifiká skolnan ku kapasidat pa por remediá retraso mediante un kurso di ‘Remedial Teacher”;
• Nos lo kaba di implementá e maneho pa enseñansa spesial i optimalisá referensia di e mucha;
• Pa loke ta trata e muchanan di enseñansa avansá foko di atenshon lo ta pa huntu ku e skolnan di VSBO i SBO ofresé e muchanan formashon mas di un karakter di “skolnan di fishi” hasiendo uso di e metanan final ku ya nos a desaroyá huntu den Raad voor Onderwijs en Arbeidsmarkt”;
• Idioma ta importante i ta bon pa nos yunan siña den nan idioma materno, pero banda di esaki ta importante pa nos muchanan siña konosé diferente idioma komo materia, manera Hulandes, Ingles i Spañó. Ta pa esaki den e aña eskolar aki nos lo dediká hopi atenshon na implementashon di nos maneho di idioma, ku ta un maneho multi-lingual;

E di dos pakete di medidanan ta dirigí riba e trahadó di enseñansa esta pa fortifiká posishon hurídiko di tur trahadó di enseñansa i asina kontribuí na mas satisfakshon di trabou;

• Lo hasi posibel pa tur dosente ku ta kuadra ku e eksigensianan por haña e promoshon di dosente A pa dosente B manera nan tin derechi riba dje;
• Lo hasi posibel pa tur trahadó di enseñansa no dosente haña klaridat pa loke ta trata nan orario di skol i nan vakashon;
• Lo hasi posibel pa harmonisá e orario di trabou na skol di tur dosente di enseñansa avansá pa 27 ora i pa banda di esei reglamentá e asina yama oranan di trabou no mara na presensia den skol segun e prinsipio di e “norm-jaar-taak”, pa asina kontribuí tambe pa baha e kantidat haltu di trahadó di enseñansa ku segun ARBO ta haña nan mes ku molèster di “burnout”;

E di tres pakete di medidanan ta dirigí pa fasilitá e proseso di enseñansa den nos skolnan i asina kontribuí pa kosnan kana mas mihó den nos skolnan;

• Den e aña eskolar binidero e proyekto di digitalisashon lo drenta den su di dos fase, esaki ta nifiká ku infrastruktura den e skolnan lo ta kla pa por kuminsá ku uzo di “devices” tantu pa e dosentenan komo alumnonan;
• Lo kuminsá ku kurso pa tur dosente i tambe pa empleadonan di ministerio di ESKD, e vishon di nos ministerio den e trayekto aki ta 4M ku ta Mucha, Maestro, Mayor i Material;
• Den e aña eskolar aki tambe lo implementá e plan pa drecha edifisionan di skol di Kòrsou, esaki ta nifiká ku tin 12 skol ku lo keda renobá.

Dia 11 di ougùstùs ta marka tambe e di dos aña ku mi persona komo minister di enseñansa, ta  konkretisá  e “Operashon pa Mehorashon di Enseñansa na Kòrsou”.  Sinembargo pueblo di Kòrsou, e intensifikason aki di mi maneho den e aña eskolar 2022/2023,  solamente lo tin chèns pa ta eksitoso si e ta tuma lugá den e espíritu  di e gobernashon aktual ku ta pará pa yega na un mehorashon di enseñansa huntu ku tur esnan ku ta envolví i ku otro ministerionan tambe.

Pa pueblo di Pueblo i huntu ku Pueblo, awor ta pueblo su bùrt pa haña un enseñansa ku di bèrdat ta sirbi desaroyo di e yu di Kòrsou i di nos Pais Kòrsou i ku ta akoplá ku nos merkado laboral.

Pues nos ta konta ku e kontribushon di ABO tambe!!!!

Na nos yunan, un aña eskolar 2022/2023 eksitoso ku forsa i sabiduria pa bosonan logra bosonan meta.

Na nos dosente i personal no dosente, danki pa den situashon difísil ku bosonan ta laborá tòg bosonan sa ta duna lo máksimo pa eduká nos yunan. Mi ta sigui konta ku boso sosten.

Televidente danki pa boso atenshon i bonochi.
—

Sr. Sithree van Heydoorn

Minister di Enseñansa, Siensia, Kultura i Deporte