Diskurso di Promé Minister Gilmar Pisas na okashon di selebrashon ofisial den kuadro di di 15 aña di Pais Kòrsou outónomo den Reino - Informashon tokante Gobièrnu di Kòrsou

Diskurso di Promé Minister Gilmar Pisas na okashon di selebrashon ofisial den kuadro di di 15 aña di Pais Kòrsou outónomo den Reino

Asuntunan General i Promé Minister
 

Diskurso di Promé Minister Gilmar Pisas na okashon di selebrashon ofisial den kuadro di di 15 aña di Pais Kòrsou outónomo den Reino

Publiká riba 10 Òktober 2025

                                                                            Diskurso di Minister-presidente Gilmar Pisas
                                                               Na okashon di selebrashon ofisial den kuadro di di 15 aña di
                                                                         Pais Kòrsou outónomo den Reino, 10 òktober 2025

Pueblo di Kòrsou,
Dama i kabayeronan, Bon dia!
Awe nos ta para aki, den kurason di Willemstad, pa selebrá un momentu grandi: 15 aña di pais Kòrsou outónomo den Reino. 15 aña di trabou, di speransa, di luchanan, pero tambe di logronan. Awe nos ta selebrá nos kousa komun, nos futuro i nos identidatkomo pais outónomo den Reino Hulandes.

15 aña pasá, nos pueblo a tuma un paso grandi pa su eksistensia. Ku determinashon, nos a bisa: “Nos ta kla pa asumí mas responsabilidat pa nos destino.” E pasonan ku nos mester a dal no semper tabata fásil, pero nos a keda para duru, nos a perseverá. I awe, ora nos mira patras, nos por bisa ku nos a krese tantu komo pueblo i komo pais.

Nos a pasa tempu bon i tempu difísil. Ta tin momentu ku speransa tabata abou, manera tabata e kaso durante e pandemia, pero nos no a pèrdè fe. Nos a siña ku kada reto ta un chèns pa nos bira mas fuerte, mas resiliente. Tambe nos a siña ku outonomia no ta un regalo, sino un responsabilidat komun pa traha huntu den union, pa koregí kaminda mester i pa sigui dilanti.

Awe ta un dia di reflekshon. Reflekshon ta importante, pasobra un pueblo ku no ta reflekshoná na kaminda ta pèrdè direkshon. Reflekshon ta yuda nos pa hasi e ahustenan nesesario pa asina nos por yega kaminda nos ke bai ku Kòrsou. Nos mester kere ku nos por hasi mihó, ku nos por drecha loke no ta bon, ku nos por sigui desaroyá nos dushi pais ku dignidat. E dia ku nos ta selebrá awe, ta un dia ku mester guia nos den e direkshon mas  mihó pa nos futuro.

E gobièrnu ku mi tin honor pa dirigí – Gabinete Pisas III – a pone su direkshon kla: nos ke un Kòrsou sostenibel, un Kòrsou hustu, un Kòrsou ku ta traha na bienestar di tur su habitantenan. No pa un grupo, sino pa kada un ku ta biba riba e pida baranka aki. Pasobra si nos no desaroyá henter pueblo, nos no ta desaroyá nos pais debidamente.
Nos desaroyo lo kuminsá den e barionan. Pasobra bario ta e lugá kaminda pueblo ta biba, kaminda bida real ta tuma forma. Kaminda hende ta traha i kria nan yunan. I si bario ta sufri, pais tambe ta sufri. Ta p’esei nos lo invertí den mehorashon di e infrastruktura den barionan, nos lo invertí den kasnan pagabel, den seguridat di barionan i e fasilidatnan básiko ku tur bario mester tin. Nos ke barionan limpi i seif, kaminda hóbennan por lanta ku bon oportunidat  i un karakter bon formá pasobra un bario fuerte ta krea un pueblo fuerte.

Den e mesun kuadro sosioekonómiko aki, nos lo sigui ku e lucha kontra pobresa, pasobra ainda tin bastante famia ku ta pasa trabou pa kubri kosnan básiko. Esaki pa nos ta inakseptabel. Nos lo sigui traha riba un sistema di sosten sosial ku ta yuda hendenan ku mester keda para riba pia. Pasobra kada hende meresé un ches real den su propio pais. Pero nos ta kere firmemente tambe den e oportunidat pa biba un bida digno via edukashon i despues trabou. Ta p’esei nos ekonomia mester sigui krese.

Nos lo trata pa diversifiká nos ekonomia pa nos no keda muchu dependiente di un solo sektor, esta e sektor di turismo. Energia sostenibel, turismo di kalidat, servisio marítimo, servisio finansiero, industria kreativo lo ta e posibel motornan di nos ekonomia nobo. Nos ke un ekonomia ku ta krea mas i mas trabou pa nos pueblo, ku ta duna chèns na hóbennan, ku ta fortifiká e situashon finansiero di nos famianan.

Nos lo atraé invershonistanan for di eksterior, pero nos mes lo guia nos rumbo. Na e hóbennan di Kòrsou ku ta den eksterior, nos ta bisa: bini bèk! Bin yuda nos ku bo talento, ku bo sabiduria, ku bo amor pa Kòrsou, pero tambe pa kombatí e ola di envehesimentu ku ta asotando nos ya pa dékadanan kaba. E futuro no ta afó, e futuro ta aki. Nos mester di bo pa sigui konstruí nos pais.

Pero desaroyo ekonómiko sin progreso sosial no tin balor. Nos mester kombiná kresementu ekonómiko ku hustisia sosial. Mas entrada di impuesto mester sirbi pa mihó edukashon, mihó kuido, kasnan pagabel, un infrastruktura ku ta sirbi pueblo di Bándabou te Bándariba. Tur esei pa nos hóbennan, nos grandinan, nos famianan – pa tur nos habitantenan sin eksklushon.

Kerido pueblo di Kòrsou, sinembargo gobièrnu no por hasi esaki su so. Nos mester di tur hende den e desaroyo aki. Empresarionan, organisashonnan sosial, hendenan individual i gruponan, tur ku tin Kòrsou den su kurason mester yuda avansá nos metanan sosial, ekonómiko, kultural riba nivel nashonal, pasobra Kòrsou ta nos tur i di nos tur. Solamente si nos traha huntu, nos por logra un transformashon i desaroyo duradero.

Personalmente ami ta kere den un Kòrsou di union. Un Kòrsou kaminda nos no ta enfoká riba kiko ta separá nos, sino hustamente kiko ta uni nos. Un Kòrsou kaminda nos ta respetá otro i kaminda nos ta traha pa mesun meta. Union ta akshon konhunto pa sirbi nos komunidat den nos aspirashon pa bira un mihó pueblo.

Nos identidat komo pueblo ta nos tesoro di mas grandi. E ta den nos idioma, den nos kultura, den nos músika, den nos kuminda krioyo, den nos historia i den nos fe den Dios. Nos identidat ta loke ta separá nos for di otronan, pero tambe loke ta uni nos komo pueblo. Pero nos no ta un isla riba nos mes, nos ta parti di un region kulturalmente riku, un Karibe ku ta yega mas leu ku laman. Nos ta un nashon chikí, pero ku gran potensial pa hasi kosnan grandi den nos region.

Ta p’esei nos mester keda konektá ku nos region i siña di otro paisnan. Nos mester traha ku otronan den nos region i asina krea aliansanan nobo den Karibe i Latino Amérika, sin pèrdè nos alma Kurasoleño. Nos mester keda fiel na nos rais, pero ku mira pa dilanti. Nos mester keda kere ku nos por hasi avansenan importante den nos region ku ta na benefisio di nos pueblo den tur área importante di bida.

Kerido pueblo di Kòrsou, awe ku nos ta selebrá 15 aña di outonomia, nos ta mira nos futuro ku konfiansa. Un futuro kaminda Kòrsou lo sigui bira mas fuerte den Reino, den region i den mundu. Por lo pronto nos lo keda ku e union den Reino Hulandes, pero ku rèspèt pa nos outonomia i igualdat entre e paisnan den Reino.

Ta un soño di mi pa aki 5 aña, ora nos yega na 20 aña di outonomia, nos por mira patras i bisa: “Si, e kambio a kuminsá aki, ku Gabinete Pisas II i III.” Mi ta gradesido ku e generashon aki di gobernantenan ku a tuma responsabilidat pa move nos pais den direkshon di un desaroyo sostenibel. Aki 5 aña mi ke mira ku nos a hasi tur loke ta na nos alkanse pa adelanto di nos pais Kòrsou, un pueblo mas uní, mas próspero, mas konsiente di su balornan i di su destino.

Kerido Pueblo di Kòrsou, nos a pasa den hopi kos, pero nos a siña hopi tambe. Ainda nos tin hopi kos mas pa logra. Pero mi tin fe, ku Dios meimei di nos, nada no ta imposibel pa nos. Ku Dios sigui bendishoná nos nashon, pa nos por bai di viktoria pa mas viktoria, di progreso pa mas progreso, pa uni i tur!

Biba Kòrsou!

Promé Minister Gilmar Pisas

Kòrsou 10 di òktober 2025

Kòrsou 10 di òktober 2025