Publiká riba 07 Yüli 2026
–
Komo famia, amistat i yunan di Kòrsou nos ta reuní awe pa selebrá Dia di Himno i Bandera di Kòrsou aki na Hulanda. Un selebrashon ku pa nos komo gobièrnu ta komparabel ku selebrá un hasimentu di aña. Pa e selebrashon ta kompleto bo ke tin bo famia di sanger i di kurason huntu ku bo. P’esei nos no por a keda sin selebrá e dia akí na Hulanda tambe. Pasobra komo pueblo asta si tin laman meimei di nos, nos ta keda unu.
For di aña 1984 nos ta selebrá nos bandera huntu ku nos himno. Pero, e aña akí e selebrashon akí ta diferente. Mundial di futbòl a laga nos realisá ku e bandera blou, hel ku blanku, i e himno ku nos ta kanta ta mas ku símbolo di nos pais. Nos a realisá ku esakinan ta forma parti tambe di ken nos ta komo persona.
Pa hopi aña nos a deseá pa tur nos yunan di Kòrsou stima Kòrsou manera nos ta stima nos famia i amistatnan, esta ku nos ta ku otro den bon i malu. Partisipashon di Kòrsou den Mundial di Futbòl a yuda nos yega aki. Pasobra, no ta boso ku ta biba den eksterior, ku semper ta pensa riba kas, so tabata kanta emoshoná: “Kòrsou, nos ta stima bo ariba tur nashon”. Nos por a mira grandi i chikí, migrante i no migrante, nan wowonan yena ku awa ora nan tabata kantu ku forsa: “Bo gloria nos ta kanta di henter nos kurason.”
Nos selekshon di futbòl a yuda nos a realisá ku nos ta grandi, aunke nos tamaño ta bisa kontrali. Durante di e periodo di klasifikashon i partisipashon na Mundial, nos yunan di Kòrsou a bai bèk na sierto norma i balor ku nos a haña di nos grandinan. Tambe nos orguyo a krese di tal forma ku nos a kuminsá kuida i defendé mas loke ta di nos, i duna ménos balor na otro su opinion. Hopi pais na mundu nan sintimentu di patriotismo, esta amor pa pais, a desaroyá basá riba un tragedia ku nan a kompartí: hamber, guera, kalamidat, etc. Pero den nos kaso, bida a mustra nos ku nos tin mag di ta diferente. Pasobra no nesesariamente algu malu mester pasa pa nos mira otro su balor, òf mustra ku nos tei pa otro. Kòrsou su partisipashon den Mundial di Futbòl a yuda nos kòrda ken semper nos tabata i ken nos ta. Manera nos kiper Room, nos tambe a siña konsentrá mas riba nos metanan i tene afó tur e golnan. Algu ku boso, bibando na un pais ku no ta kas, tin ku hasi regularmente, sino ta tur dia: Tene afó komentario i krítika ku no ta yuda ku nada, i perseverá sin entregá pa logra boso metanan di manera ku un dia boso por ta bèk na kas.
Nos himno ta kòrda nos hopi kos. No ta pòrnada den e di dos kuplèt nos ta kanta: “Nos pueblo tin su lucha, ma semper nos tin fe di logra den tur tempu viktoria ku trabou!” E yu di Kòrsou ta konosí pa ta un pueblo ku tin fe. Ku otro palabra nos ta hende ku tin konfiansa den algu mas grandi ku nos, ku ta yuda, protegé i duna nos loke nos tin mester. No ta importá kua ta e religion òf kreensia. Ta e konfiansa akí ta sòru pa ora e kosnan ta parse imposibel, nos por keda trankil, pasobra nos sa ku loke pa un por parse derota pa nos e ta nos viktoria.
Union a hasi nos grandi, i ta ku e union akí nos a skirbi huntu nos historia nobo: e historia di e Blue Nation. Ku ta un nashon ku sin importá unda el a nase, ki idioma e ta papia òf unda e ta biba, ta papia di Kòrsou i su hendenan ku amor i orguyo. E ta hasi esaki no pa sinti su mes mas, òf kompará su mes ku otro. Sinó pasobra awor e sa mihó su balor, i el a komprendé dikon nos ta kanta: “Laga nos uni forsa p’asina triunfá.” Pasobra si nos tuma nos selekshon komo ehèmpel, pa e yu di Kòrsou no tabatin barera di rasa, koló, ni idioma. Tabatin e pensamentu: pone nos abilidat- i talentonan huntu pa nos logra e meta, i hasi nos pais; e yunan di Kòrsou, kontentu i orguyoso.
Kòrsou su selekshon i su partisipashon den mundial di futbòl a yuda nos komprendé mihó kada letra di nos himno, di manera ku awor nos no ta únikamente kant’é, pero nos ta bib’é. E koló di nos kurason a kambia bira e koló di nos bandera, i awor nos ta biba nos identidat ku orguyo i honor. Ohalá ku nos tur, yu di Kòrsou, di e Nashon Blou, por keda biba i kompartí e kualidatnan di nos grandinan ku nos a rebibá, manera perseveransia, konfiansa den nos mes, amabilidat i dinamismo, nos kalor karibense, nos hermandat, nos fe, i nos amor i orguyo pa ken nos ta i di unda nos ta bin. Pasobra ora nos ta midi kon grandi nos ta, ta ku e midínan akí nos ta midi nos mes. Ta nos kualidatnan humano ta hasi nos e digno yu di Kòrsou ku awe ta selebrá su dia di Himno i Bandera pafó di kas tambe.
Felis dia di Himno i Bandera, i kòrda ku nos ta gradesido pa boso aporte na distansia. Sa ku gobièrnu di Kòrsou tei semper pa sostené boso via Kas di Kòrsou, i ku kas semper lo tin su portanan habrí ta warda boso yega bèk.
[FIN]
