DÒKTERNAN DI KAS MESTER REANUDÁ NAN KONSULTANAN MAÑAN MAINTA I MESTER ENTREGA SIFRANAN PA INVESTIGASHON DI RAC
Publiká riba
05 Novèmber 2026
ANUNSIO
Publiká 5 di novèmber 2026
Willemstad – Den e kort geding di Pais Kòrsou kontra Curaçaose Huisartsen Vereniging (CHV), ámbos partido a yega na un akuerdo awe durante e seshon di korte, basá riba un proposishon di hues pa un solushon amistoso.
E siguiente akuerdonan a ser hasí entre ámbos partido:
- CHV lo hasi un yamada na su miembronan pa nan reanudá nan konsultanan regular for di mañan mainta, djabièrnè 6 di novèmber 2026.
- Dentro di poko tempu, Regulatory Authority of Curaçao (RAC) lo ehekutá un investigashon di preis di kosto, efisiensia i tarifa tokante e tarifa di abono (abonnementstarief) pa dòkternan di kas. Aktualmente, e tarifa aki ta Cg 182,30 pa kada pashènt pa aña.
- E investigashon lo kuminsá na yanüari 2027, asina ku dòkternan di kas entregá e datonan nesesario na RAC.
- Dentro di un siman, RAC lo informá CHV kua datonan dòkternan di kas mester entregá pa e investigashon.
- Ámbos partido lo deliberá tokante un posibel oumento temporal di e tarifa di abono. Un eventual oumento por drenta na vigor solamente despues ku dòkternan di kas entregá e datonan ku RAC a solisitá. E oumento temporal lo keda na vigor te ora RAC entregá e resultadonan di su investigashon.
Si e akuerdonan no ser kumplí, e tratamentu di e kort geding lo kontinuá djaluna 16 di novèmber 2026.
Minister Boekhoudt a deklará:
“For di mañan, pashèntnan por bolbe akudí na nan propio dòkter di kas. Esaki tabata lo mas importante pa mi. Ademas, awor ta duidelijk tambe dilanti di hues, ku un adaptashon di tarifa mester pasa via un investigashon independiente di RAC, basá riba e sifranan di dòkternan di kas mes. Sin datonan, no por hasi investigashon i Minister tampoko no por konsiderá un oumento temporal. Mas lihé dòkternan di kas entregá nan datonan, mas lihe e investigashon por ser finalisá.”