Publiká riba 24 Ougùstùs 2023
Ta trata aki di kombustibel ekivalente na e norma di Euro 4
Willemstad- E Grupo di Trabou, ku ta konta ku representashon aktivo di Ministerio di Desaroyo Ekonómiko (MEO), Ministerio di Salubridat Públiko, Medio Ambiente i Naturalesa (GMN), Asosiashon doñonan di pòmp di gasolin, Curoil ku ta e provedor eksklusivo di gasolin (Mogas 95) i diesel ((U)LSD) na Kòrsou, Bureau Telecommunicatie & Post (BTP), huntu ku Curaçao Heavy Equipment Association (CHEA), Sindikato Transporte Uní (STU) i Curaçao Car Dealers Association (CCDA), a entregá e Guia di e Kalidat di Kombustibel den kua ta determiná e spesifikashonnan nobo ku ta garantisá mihó kalidat di gasolin (Mogas 95) i diesel ((U)LSD), ekivalente na e asina yamá: Euro 4, ku ta e norma ku ta wòrdu usá na Europa.
Manera Kisas ya ta konosí, bou di guia di e Grupo di Trabou, SGS INSPIRE a hasi un estudio di nos kombustibel aki na Kòrsou. For di esaki a sali rekomendashonnan konkreto pa un mihó kalidat di kombustibel, ekivalente na Euro 4, pa Kòrsou. Spesífikamente pa loke ta trata gasolin i diesel. Ta di remarká ku aki a tene debido kuenta ku e konsekuensianan finansiero-ekonómiko ku e rekomendashonnan pa introdusí kombustibel di mihó kalidat lo trese kuné.
Konsekuensianan finansiero ku e mihó kalidat aki ta trese kuné lo ta e.o. un subida leve di e preis di gasolin i diesel di alrededor di 3 sèn i 2 sèn respektivamente kompará ku e preisnan vigente.
Minister Cijntje ta asentuá i remarká ku banda di un kalidat mas mihó ekivalente ku Euro 4 di kombustibel, e rekomendashonnan akí ta nifiká tambe mas i mihó efisiensia i rendimentu di e motornan di nos vehíkulonan i tambe ménos gastu na mantenshon di esakinan.
Ku hopi orguyo, Minister Cijntje ta duna e primisia ku e rekomendashon di spesifikashonnan nobo di gasolin i diesel a ser tratá i aseptá den Konseho di Ministernan djárason 23 di ougùstùs. Konforme planifikashon, e promé ‘batch’ di e kombustibel di mihó kalidat akí lo yega entrante novèmber próksimo. Minister Cijntje ta gradisí un i tur ku a bin ta koperá i traha kabalmente riba e trayekto akí.
Medio sèptèmber lo lansa e trayekto di komunikashon den kua konhuntamente ta bai informá pueblo di Kòrsou tokante henter e trayekto di introdukshon di e kombustibel nobo i di mihó kalidat aki ekivalente na Euro 4.
