Publiká riba 17 Mei 2026
Willemstad, Kòrsou – Ministerio di Enseñansa, Siensia, Kultura i Deporte (OWCS) ta mira ku satisfakshon bèk riba e eksitoso konferensia di trabou “Enseñansa i Merkado Laboral den Diálogo”, ku a tuma lugá riba djabièrnè 13 di mei 2026 na Courtyard Marriott Hotel.
E konferensia, organisá den kuadro di e programa Mehorashon di Enseñansa, a konta ku un sala yen ku hóbennan, representantenan di merkado laboral, profeshonalnan di enseñansa i representantenan di diferente ministerionan ku a bin huntu pa traha riba fortifikashon di e konekshon entre enseñansa i merkado laboral na Kòrsou.
E konferensia a ser karakterisá ku diferente seshonnan di diálogo, un panel di studiantenan i kombersashonnan ku representantenan di merkado laboral. Den esaki no tabata bai solamente pa skucha otro, si no prinsipalmente pa hiba un diálogo habrí, honesto i konstruktivo tokante e mismatch entre enseñansa i merkado laboral. Tokante programanan i estudionan den enseñansa ku ta enfoká demasiado riba konosementu pa optené un diploma, miéntras ku merkado laboral ta pidi mas i mas pa abilidat, aktitut profeshonal, fleksibilidat i kompetensianan ku ta pas den e desaroyo ekonómiko di nos isla.
Komo punto di salida durante e konferensia a indiká for di inisio ku no ta e intenshon pa pensa den limitashonnan òf loke no ta posibel, sino mas bien pa konhuntamente buska oportunidat, eksplorá e posibilidatnan i alternativanan komo solushon. E preguntanan sentral durante e konferensia tabata: kon por logra un mihó konekshon entre enseñansa i merkado laboral i kon por sòru pa partidonan komprondé otro mihó saliendo for di un mesun vishon kompartí i papiando e mesun idioma?
Un parti partikular di e programa tabata e panel ministerial den oranan di atardi, konsistiendo di e ministernan di OWCS, SOAW, MEO i BPD. Saliendo for di nan propio responsabilidat i perspektiva, e ministernan a drenta den diálogo ku otro i ku e partisipantenan riba e tópiko di mehorashon di e konekshon entre enseñansa i merkado laboral i kon nan respektivo ministerionan por yuda i fasilitá den esaki. Riba inisiativa di minister di OWCS Sithree van Heydoorn, e kuater ministernan a firma un “Letter of Intent” (LOI) interministerial, den kual ta konfirmá nan kompromiso pa traha di un forma struktural riba e tema aki.
E konferensia a konkluí ku 8 tema i puntonan di atenshon kual ta: desaroyo personal i soft skills; siñamentu trahando (werkend leren) i eksperensia práktiko; aktitut profeshonal, preparashon di e mentor i guia na sitio di trabou; modernisashon i aktualisashon di e kontenido i forma di trese enseñansa; komunikashon entre enseñansa, merkado laboral i gobièrnu; desaroyo di abilidat “skills”, diploma i desaroyo pa bida largu; i tambe e Future of Work. E temanan aki lo wòrdu elaborá mas aleu den e periodo benidero i presentá pa validashon i profundisashon na stakeholders durante e siguiente konferensia ku lo tuma lugá na prinsipio di novèmber 2026.
Minister di OWCS ta mira ku satisfakshon atras riba e resultadonan di e eksitoso konferensia aki. E kombersashonnan di awe a mustra ku e solushon no ta responsabilidat di un partido o persona so. Enseñansa, merkado laboral, gobièrnu, mayornan i hóbennan tur tin un ròl den esaki. E desafio ta grandi pero, e disposishon pa traha huntu ta presente. Esaki ta duna perspektiva pa futuro di Kòrsou.
