Entrega di tésis na Minister Sithree van Heydoorn

Licenciado den Siensia Religioso srta. M. L. Macaya Kirindongo ta entregá su tésis na Minister Sithree van Heydoorn

Willemstad – Minister di Enseñansa, Siensia, Kultura i Deporte (ESKD) sr. Sithree van Heydoorn ta risibí na su despacho srta. Marianela Luisa Macaya Kirindongo. Srta. Macaya ta suidadano di Kòrsou i graduado di Universidat Katóliko na Santo Domingo ku a gradua na e universidat-fakultat di siensia religioso: “Communidad de La Visitación y la Eucaristía Escuela de Teología para Seglares”.

Pa obtené e título di Licenciado i gradua na e universidat srta. Macaya a hasi un investigashon titulá: Evaluashon i aktualidat di edukashon katóliko na Kòrsou for di e periodo di 1842 te ku aña 2018. Ku e investigashon aki e a gradua summa cum laude i obtené e Premio “Octavio” un premio prestigioso na honor di Kardenal Octavio Antonio Beras Rojas di e Universidat na Santo Domingo. For di e investigashon aki hopi otro studiante, profeshonalnan di enseñansa i dosentenan di henter e komunidat katóliko na Santo Domingo i lokal akinan por haña informashon balioso pa ku e aktualidat di nos enseñansa.

Ku hopi honor i plaser Minister di ESKD sr. Sithree van Heydoorn a risibí e tésis titulá: Evaluashon i aktualidat di edukashon katóliko na Kòrsou for di e periodo di 1842 te ku aña 2018. Na mes momentu a interkambia di informashon i idea pa ku enseñansa katóliko i enseñansa en general. Minister di ESKD ta sumamente kontentu ku nos mes hendenan ta profilá di forma positivo i hasi investigashonnan pa sigui guia nos enseñansa den bon kaminda.

—
KOMUNIKASHON

**riba e potrètnan athunto por tuma nota di e kombersashon i entrega di e tésis na Minister Sithree van Heydoorn.