Publiká riba 14 Sèptèmber 2026
Willemstad – Den kuadro di e proyekto “Kòrsou ta Produsí”, preparashonnan pa renobashon di e instalashon pa purifiká awa na Tera Kòrá a kuminsá. Dor di renobá i hasi varios mehorashon na e instalashon, por pone esaki bèk den funshon pa asina Gobièrnu oumentá disponibilidat di awa pa agrikultura lokal, spesialmente pa agrikultornan na Bandabou.
Na final di 2025, Ministerio di Salú, Medio Ambiente i Naturalesa (GMN) a kuminsá ku e proyekto “Kòrsou ta Produsí”, ku ta kai bou di responsabilidat di minister Gilmar Pisas, enkargá ku Medio Ambiente i Naturalesa. Meta di e proyekto ta pa aselerá kresementu di produkshon agríkola i kria di bestia na Kòrsou, i pa asina oumentá produkshon lokal di kuminda. Sostené agrikultornan lokal i mehorá e kondishonnan bou di kua nan por produsí ta parti importante di e proyekto.
Den e kuadro aki, minister Gilmar Pisas a disidí pa laga renobá e instalashon pa purifiká awa na Tera Kòrá. Aktualmente e instalashon no ta na funshon. Dor di pone esaki bèk den funshon, lo por hasi awa purifiká disponibel pa uso agríkola.
Spesialmente pa agrikultornan na Bandabou, esaki ta nifiká un mehorashon importante. Dor di hasi awa disponibel mas serka di e área, agrikultornan lo tin akseso mas fásil na awa pa nan aktividatnan. E awa, ku entre otro ta ser purifiká di bakteria ku lus UV, ta destiná pa uso agríkola i no ta awa pa bebe. Komo por usa awa purifiká pa agrikultura, e por ser hasí disponibel na un kosto mas abou ku awa pa bebe. Ademas, e distansia mas kòrtiku por yuda limitá gastunan di transporte di awa.
Preparashonnan pa e renobashon a kuminsá kaba. E trabounan lo ser ehekutá den kolaborashon ku Ministerio di Tráfiko, Transporte i Planifikashon Urbano (VVRP).
Ku renobashon di e instalashon pa purifiká awa na Tera Kòrá, Gobièrnu ta dal un siguiente paso konkreto pa sigui sostené sektor agríkola lokal. Un disponibilidat mas mihó i pagabel di awa ta kontribuí na mihó kondishonnan di produkshon pa agrikultornan na Bandabou i ta brinda oportunidat pa amplia produkshon agríkola den e área.
Di e manera aki, e proyekto ta kontribuí na oumento di produkshon lokal di kuminda, fortalesementu di seguridat alimentario i redukshon di dependensia riba importashon di kuminda.
