Publiká riba 16 Aprel 2026
WASHINGTON, D.C. – Durante un bishita na Washington D.C., Promé Minister di Kòrsou, sr. Gilmar Pisas, i Minister di Finansa, sr. Charles Cooper, huntu ku Presidente di Banko Sentral di Kòrsou i Sint Maarten, sr. Richard Doornbosch, a tene un reunion konstruktivo ku sr. Nigel Chalk, Direktor di Departamento di Hemisferio Oksidental di International Monetary Fund (IMF).
E reunion akí tabatin un karakter stratégiko importante, kaminda Kòrsou a reafirmá su posishon i liderato den IMF. Durante e diálogo, a papia riba e situashon ekonómiko aktual di Kòrsou, inkluso e desaroyo makroekonómiko di último añanan (kresementu fuerte despues di COVID), rendimiento fiskal i perspektivanan pa kresementu sostenibel.
Un punto importante tabata tambe e vulnerabilidatnan ku un isla chikí manera Kòrsou ta enfrentá, manera dependensia di turismo i e influensia di shòk eksterno, entre otro e tenshonan geopolítiko i riesgonan klimátiko. Kada partido a rekonosé e nesesidat pa planifikashon adaptativo i pa fortifiká resilensia ekonómiko pa futuro.
Den e kuadro di kooperashon ku IMF, a eksplorá oportunidatnan pa asistensia tékniko i kolaborashon mas profundo, basá riba uso di dato i ekspertisio pa sostené desaroyo ekonómiko i stabilidat a largo plaso.
Pa Kòrsou, e reunion a resultá den vários benefisionan konkreto:
• Fortalisashon di e relashon ku liderato di IMF pa logra mas apoyo stratégiko;
• Mas oportunidat pa asistensia tékniko i ekspertisio di alto nivel;
• Posishonamentu di Kòrsou komo un partner serio i konfiabel den region.
E reunion a reafirmá e importansia di mantené un diálogo kontinuo entre Kòrsou i IMF, ku e meta pa sostené stabilidat ekonómiko i promové un desaroyo inklusivo i sostenibel.
E presensia di Promé Minister Gilmar Pisas i Minister Cooper a manda un mensahe kla: Kòrsou ta uní, serio i kla pa sigui traha huntu ku partnernan internashonal pa logra un futuro ekonómiko mas resiliente i sostenibel pa nos hendenan.