Gobièrnu ta invertí den nos hóbennan a traves di wega di dam

WILLEMSTAD – Awe, djabièrnè 29 di ougùstùs, Minister Middelhof na nòmber di Promé Minister Pisas, a risibí 5 hóben ku a partisipá na e “2nd Caribbean Youth Draughts Championship” ku a tuma lugá aki na Kòrsou di 13 pa 20 di ougùstùs 2025. E kampionato por a konta ku partisipashon di 4 pais kual ta Boneiru, Trinidad, Sürnam i Kòrsou.

E 5 hóbennan akí a representá Fundashon Wega di Dam Rais i a gana e siguiente títulonan:

• Daniel Al Jurdi, di 2 lugá U12 boys
• Lorayn Louisa, di 2 lugá U12 girls
• Elise Rijnschot, di 3 lugá U12 girls
• Tahirah Rombley, di 3 lugá U16 girls
• Ri-Anne Rafaela (Kampion U16 girls); E hóben akí a prolongá su título.

E fundashon ta sumamente agradesido na Gobièrnu di Kòrsou pa e sosten finansiero di forma ku por a kubri algun gastu. Sin esaki e kampionato no ta por a tuma lugá. E fundashon alabes a indiká di ta kontentu ku e trabou di kuerpo polisial pa e sosten ku a duna na momentu di transportashon di e hóbennan durante e kampionato.

E 5 hóbennan akí awor lo bai representá Kòrsou 20 di òktober próksimo na Turkia.

E wega di dam ta yuda e hóben desaroyá vários abilidat pa den futuro. Gobièrnu di Kòrsou ta sumamente orguyoso di nos hóbennnan i ta deseá nan tur klase di éksito na Turkia.

MAS NOTISIA

Ministerio konserní: Asuntunan General i Promé Minister