Gobièrnu ta traha riba palabrashon konkreto pa Kòrsou bira miembro di IOC komo pais

Minister Sithree van Heydoorn ta reuní ku sra. Nicole Hoevertsz di Komishon Olímpiko Internashonal (IOC)

Willemstad – Minister di Enseñansa, Siensia, Kultura i Deporte (ESKD), sr. Sithree van Heydoorn, den representashon di Gobièrnu di Kòrsou huntu ku kolaboradornan di maneho di Ministerio di ESKD, ta biaha pa Aruba pa reuní ku sra. Nicole Hoevertsz kende ta vise-presidente di e Komishon Olímpiko Internashonal (IOC). Meta di e reunion ku sra. Hoevertsz ta, pa amplia riba posibilidatnan i yega na akuerdonan preliminar pa Kòrsou haña rekonosementu i partisipashon na weganan Olímpiko bou di nos mes bandera. E reunion ta tuma lugá djaluna, 28 di febrüari 2022.

Aparte di ta fungi komo vise-presidente di IOC, Sra. Nicole Hoevertsz ta tambe miembro ehekutivo di e Komishon Deportivo Panamerikano. Ta importante pa por tin un bon relashon ku paisnan i ku IOC. Den e reunion ku lo tuma lugá djaluna próksimo, lo eksplorá tambe huntu ku IOC e posibilidatnan pa yega na oportunidat i kondishonnan di desaroyo igual pa deporte i atletanan di Kòrsou.

Paralelo na e proseso di rekonosementu di Kòrsou na IOC, ta importante pa eksplorá otro posibilidatnan pa Kòrsou risibí sosten finansiero i sosten tékniko for di IOC. Kòrsou lo hasi uso di e oportunidat akí tambe pa “follow-up” riba e státus di nos petishon pa Kòrsou bira miembro di Panam Sports. Statutonan di Panam Sports a keda adaptá di tal forma, ku Kòrsou por apliká pa bira miembro. Esaki, Kòrsou a hasi tambe i ta wardando riba kontesta. Akseptashon na Panam Sports no solamente ta nifiká ku Kòrsou por partisipá ku su atletanan na weganan Panamerikano, sino tambe esaki tin e benefisio ku Kòrsou por risibí sosten finansiero i tékniko.

Ministerio di Enseñansa, Siensia, Kultura i Deporte ta spera di yega na palabrashonnan konkreto pa por duna nos atletanan e oportunidat pa representá nos pais i kompetí bou di e Bandera di Kòrsou.

MAS NOTISIA

Ministerio konserní: Enseñansa, Siensia, Kultura & Deporte