Homenahe na Miss Kòrsou

WILLEMSTAD – Gobièrnu di Kòrsou den estrecho koperashon ku Curaçao Tourist Board (CTB) ta duna homenahe na nos Miss Universo srta. Gabriela Dos Santos. Djarason 18 yanüari último na su yegada na aeropuerto Hato nos Miss a keda risibí pa Minster sra. Ruthmilda Larmonie-Cicilia huntu ku direktor di CTB sr. Muyrad de Bruin. Minister Larmonie-Cicilia a felisitá i gradisí nos Miss Kòrsou pa su presentashon i logro na Estados Unidos den e magno kompetensia di beyesa Miss Universo. Na nòmber di Gobièrnu minister ta hasi entrega di un bukèt di flor i na mes momentu ta invitá nos Miss pa e selebrashon huntu ku Pueblo riba djadumingu, 22 yanüari 2023.

Riba djadumingu, e homenahe na honor di Miss Kòrsou srta. Gabriela Dos Santos ta kuminsá na  tereno di CAH (Hato) den forma di un karavana direkshon pa Riffort Village kaminda ta tene un selebrashon kultural. Den e karavana nos Miss Kòrsou ta keda kompaña pa Curaçao Beauty Pageant, sra. A. Maria, pa vários miss i eks-miss di Kòrsou mas. Na yegada na Riffort nos Miss Kòrsou i su delegashon ta keda risibí pa Minister Ornelio Martina i Sekretario – General di Ministerio di ESKD sra. Susan Larmoinie-van Heydoorn.

Riba un bunita esenario dekorá na honor di nos Reina, sra. A. Maria den representashon di Curaçao Beauty Pageant a hiba palabra i gradisí nos Miss Kòrsou pa su presentashon i logro na Miss Universe. Den representashon di Gobièrnu di Kòrsou Minister Ornelio Martina ta hasi entrega di un regalu na nos Reina srta. Gabriela Dos Santos i alabes Sekretario-General sra. Susan Larmonie ta hasi entrega di un bunita trofeo na nos Reina di beyesa. Durante di e homenahe vários presentashon ta keda tené dor di D’ Art, Dj RO-1 i agrupashon di Brassband.

—

KOMUNIKASHON

** riba e potrètnan athunto por tuma nota di e homenahe na honor di nos Miss Kòrsou srta. Gabriela Dos Santos.