Publiká riba 12 Ougùstùs 2022
WILLEMSTAD – Selebrando dia internashonal di hubentut 2022, Nashonnan Uní a proklamá ‘Solidaridat entre generashonnan’ komo tema prinsipal pa inkorporá mundialmente den maneho di paisnan asosiá. Ministerio di Desaroyo Sosial, Labor i Bienestar (SOAW) sin mas ta rekonosé importansia di e tema akí i na mes momentu ta konsiente ku pa logra esaki, mester sigurá oportunidat di desaroyo i partisipashon real di kada generashon na bienestar di nos pais.
Hubentut komo generashon di relevo den nos komunidat mester por konta ku amor, komprenshon i kooperashon di nos tur, pa e siña konosé su mes, su kapasidatnan i su talentonan. Nos hubentut mester tin espasio pa praktiká, partisipá, kai i lanta bèk den su proseso di desaroyo, konosé su personalidat, su abilidatnan i su futuro. Nos poblashon mester tin oido pa nesesidat, preokupashonnan i, spesialmente, soño di nos muchanan.
P’esei, komo minister di SOAW, entre otro enkargá ku hubentut, mi ta promové un maneho ku mester habri kaminda pa mas i mihó partisipashon di nos hubentut. Mi ke realisá mas partisipashon di hóbennan riba merkado laboral. E porsentahe di desempleo bou di nos hubentut ta indikativo pa e falta di inklushon ku ta reina den nos pais.
E proyekto ‘E hóben, e relevo’ ta dirigí riba pone esnan na kantu pará, ku ta deseá pa laborá, riba un proseso di formashon ku ta habri oportunidatnan nobo pa nan drenta un futuro deseá. Ku un aserkamentu integral na nivel di bario, mi ke mira nos barionan komo fuente di formashon i espasio di partisipashon di nos hóbennan. Barionan kaminda huntu ku SOAW ta brinda sosten sosial i emoshonal na famianan ku mester di esaki.
Mi ke sigurá ku nos komunidat ta na altura di derechinan universal di nos hóbennan i den e mes rosea mi ke konsientisá nos hubentut di nan derechinan, nan posishon kardinal den desaroyo di nos pais, awe i den futuro.
Un pabien na abo ku ta hóben, abo ku ta un di nos flornan di futuro.
